Gonal Fulfulde ndeer gannde kese

Fulfulde e gannde kese, ko tiitoonde winndannde nde wiɗtooɓe ɗiɗo (2) misranaaɓe hawtiti winndi, ɓen ngoni : Dr. Aadel Usmaan Imam Ayat, jannginoowo ɗemɗe afrik, to Duɗal Ɗemɗe e Eggo (faculté de Jokkito »

Ciimtol FPU & FPUNA nder Washington: 7, 8 & 9 lewru Morso (July), 2017

Taariika Fulɓe Progressive Union (FPU) ko mojobere daraniinde fiyaakuuji renndo e pinal. Ko e hitaande 1966 nde sincaa e nder Sarlon. Innde mayre aranere nden fewndo nde sincaa ko Fullah Youth Organization Jokkito »

Nafitorgol karallaaji kesi fii jannugol Fulfulde

 Gila internet layi, humindiri jamaaji ɗin, wontuno laawol lumbinirngol miijooji e eɓɓooje, maandinirngol jannde e gannde. Ko e ngol laawol kadi yimɓe ɓen waɗti daɗndirde ngaddamaakuuji maɓɓe e finaa-tawaaji maɓɓe, seɓitoriiɗi mulugol. Jokkito »

Miijo: Yahugol njananiri fii ɗaɓɓere e nguu jamaanu hannde!

Fulɓe wi’i: « Mo haylaaki o haylay hoore ». Ndee tiitoonde yahugol njananiri fii ɗaɓɓere e nguu jamaanu hannde no hitti fota fota, teeŋtinii wonande sukaaɓe wontirɓe hiirnaange Afrika (west Africa), sabu yaltugol fii Jokkito »

Fulɓe e Luumol nder Najeeriya

Joomirawo waddii jamanu ko halli to Fulɓe Najeeriya: Na’i amen keeñi. Iyaalu ɗuuɗi. Ko ɗuuɗi nder sukaaɓe amen accii durngol ngam na’i keppaama – ɓe ngalaa ilmu, ɓe ngalaa sanaa’a, faa woɓɓe Jokkito »

 

Miijo: Yahugol njananiri fii ɗaɓɓere e nguu jamaanu hannde!

Fulɓe wi’i: « Mo haylaaki o haylay hoore ». Ndee tiitoonde yahugol njananiri fii ɗaɓɓere e nguu jamaanu hannde no hitti fota fota, teeŋtinii wonande sukaaɓe wontirɓe hiirnaange Afrika (west Africa), sabu yaltugol fii ɗaɓɓere bonaa, hino moƴƴi, kono taw si ko wonɗo woo haani yaltude yaha e njananiri fii ɗaɓɓere? Hol ko waɗi sukaaɓe Afrik no himmiri yahugol e leyɗeele njanane ngam ɗaɓɓere? Hol ko haani wonde himme e faale neɗɗo yahoowo njanari fii ɗaɓɓere? Ley ɗoo, mi etoto jaabagol ɗee ɗoo lamnde, mi holla kadi yoga e nafaaji e lorraaji humondirɗi e yahdu njananiri fii ɗaɓɓere.

Ko adii fow, hino joopaa wonde e nder hitaande 2016 nden tun ko ɓuri yimɓe 5000 wonnooɓe e hoore laawol yahdu njananiri yoolike ka maayo hakkude Afrik e Erop (Mediterranean sea). Ɗee maayeele non, hino jokki ɓeydagol e ngol laawol, himme e faale sukaaɓe ɗuuɗuɓe nder hirnaange Afrik fewndo ɗoo ko yahdu njananiri fii ɗaɓɓere.

Yo mi artir ƴamol aranol ngol dow ɗoo: Taw si ko wonɗo woo haani yahude njananiri fii ɗaɓɓere? Gooto kala no haani himmirde wuurugol ka leydi mum wona tawaaɗo e dariiɓe fii ɓamtugol ndi, ko fii Aarabeeɓe ɓen no mari tinndol wi’ungol wonde: « Yiɗugol leydi mum ko jeyaa-ɗum e gomɗinal, wonɗo woo mo yiɗaa leydi mum ndin laatotaako tedduɗo ». E kadi, jeytaare nde o mari nden ka leydi makko, o heɓataa ɗum e leydi woo nder winndere nden (adunaaru ndun).

E nder hitaande 2016 nden tun ko ɓuri yimɓe 5000 wonnooɓe e hoore laawol yahdu njananiri yoolike ka maayo hakkude Afrik e Erop (Mediterranean sea)

ko ɗum waɗi si Abdullaay keeta wi’i e gimol makko: « Ɗuuɗa waɗa yiilotaako ». Sabu wonaa ko o waɗata ka leydi makko fow o waɗataa ka njananiri. Ɗum hollii wonnde si goɗɗo no mari fehre heɓugol nguuree makko on e ɓeynguure makko nden ka leydi makko, wata o himmir yahdu njananiri, ka liddu (instead); yo o ɓeydu wakkilaade ɗon, arma Alla ɓeyda wallude mo ñannde goo, sabu no jeyaa marɓe ɓuɓtu-ɓernde e nguu jamaanu men hannde, ɓen ɓe Alla newinani wuurugol ka leydi mum.

Gooto kala no haani himmirde wuurugol ka leydi mum wona tawaaɗo e dariiɓe fii ɓamtugol ndi

Ko hikkii ɗon, no jeyaa e ko woni sabu sukaaɓe hirnaange Afrik himmiri yahdu njananiri:

  1. Anngal golle: sukaaɓe ɗuuɗuɓe gaynii janngude; heɓtii seedeeji mum, kono ɓe ronku heɓude to ɓe liggoo (golla) walla hay siɓe heɓii ka ɓe golla, njoɓdi maɓɓe ndin yonantaaɓe.
  2. Tamƴinagol nguurndam newiiɗam: ngoo ɗoo miijo, wonaa sukaaɓe ɓen tun jogii ngo, yimɓe buy (ɗuuɗuɓe) hino sikki wonde si goɗɗo yahii njananiri, teeŋtinii leyɗe porto (tuubaako), o wontay kisan galo (alɗuɗo) e mbaadi otomatik (automatically), ɗum ɗoo no kirɗani (jalnanii) ɓe anndaa ɓen.
  3. Jiñinannde goreeɓe: e ngoo senngo ɗoo, laylati renndo ɗin (the social networks) no lorrude sanne sanne, sabu woɓɓe ko nate ɗe ɓe yi’ata weldiɓɓe maɓɓe wonɓe ka njananiri ɓen no posta (saaka) walla ko ɓen yeewtataɓe kon ekn jiñinta ɓe, ɓe sikka wonde moƴƴere nde ɓen alaa heɓude ka ɓe woni ton woodaaka.

Wonaa ɗii ɗoo tun, sabuuji ɗin no ɗuuɗi pandi, si en limtii en gaynataa, kono annditen wonde wonaa yahugol ngol ɗaɓɓaa, ko gaynugol ngol. Woɓɓe no ñiiɓa ka leydi mum wona gaynuɓe haaju, ko ɓen min mi yelii wonde tawaaɗo e mum.

E senngo goo, no woodi woɓɓe ɓe tawata gaynii woo tuma ɓe yalti ka leydi maɓɓe, ɓen no mari himme, awa kadi ko ɓuri kon ko aannde yaltintaɓe, sabu ado ɓe yaltude, a taway ɓe rewii e kore e payanɗe (ɓe etike haaɗtirde etagol) fii wonugol ka leydi maɓɓe kono ɓe ronku fehre, on tuma non ɓe etora ka njanari kadi.

Woɓɓe no ñiiɓa ka leydi mum wona gaynuɓe haaju

Ko himme e faale ɓen ɗon on yahoowo njananiri fii ɗaɓɓere haani jogaade, ko ɗum woni: yahugol ɗaɓɓere ganndal e jawle ko wallitora hoore mum, ɓeynguure mum e leydi mum ndin ontuma arta ñiiɓa ka leydi mum.

wuuruɓe ɓen ka njananiri wonaa mettuɓe goollidugol e mum, ɓay ɓe naɓidii e nooneeji yimɓe ɗuuɗuɓe, ko ɗum waɗi ɓe wonaa sewɓe gacce (weluɓe haɓidude)

E kadi, nafaaji ɗuuɗɗi no wondi e yahdu njananiri fii ɗaɓɓere, wano balle ɗe yahuɓe ɓen wallirta yimɓe maɓɓe jooɗiiɓe ɓen, gila e neldugolɓe mbuuɗi haa e yoɓangol miññiraaɓe maɓɓe wonɓe janngude, walla gannde nafooje ɗe ɓe jannginta ɓiɗɓe leydi ndin si ɓe artii, maaɗum faamu ngu ɓe heɓata ngun ton, sabu ko heewi kon, wuuruɓe ɓen ka njananiri wonaa mettuɓe goollidugol e mum, ɓay ɓe naɓidii e nooneeji yimɓe ɗuuɗuɓe, ko ɗum waɗi ɓe wonaa sewɓe gacce (weluɓe haɓidude) ekn.

Wano anndirɗen non huunde marnde nafa nde maraa lorra ɗuuɗaa, ko non woniri duumagol ka njanari pandi no wondi e lorraaji seeɗa, wano ko yahuɗo on luttetee yonta (generation) makko on kon, woɗɓe no yaha wona duuɓi ɗuuɗɗi, tuma ɓe artoyi, ɓe tawa hiɓe wa’i wa koɗo ka maɓɓe, yimɓe ɓe ɓe anndunoo goo eggii walla maayiino hara ɓiɗɓe goo kadi heɓaama haa njanɗiino, hay miññiraaɓe maɓɓe ɓe ɓe accunoo ko paykoy woniino jom-galleeɓe ekn.

Fii timmingol, mi wi’ay wonde kala faalaaɗo yahugol njananiri ngam ɗaɓɓere, yo o tasko taho haa o annda si tawii laawol alaa ngol o heɓirta ko o ɗaɓɓoyta kon e njanari ka leydi makko.

Mi wi’a kada kala yahuɗo walla faalaaɗo yahude njananiri fii ɗaɓɓere yo waɗtan yili (haqqil) e gimol Rica wi’eteengol yahdu safaari ka o wi’i ɗon:

Wonaa fii wonɗo woo yahdu ndun  /  ko Alla laamɗo on newnata  /  woɗɓe ko ka weeyo rewrata  /  woɗɓe yiltoyee  /  woɗɓe naatoya  /  woɗɓe ko ka maayo rewrata  /  woɗɓe maayoya  /  woɗɓe naatoya  /  woɗɓe ko ka laawi rewrata  /  woɗɓe hewtoya  /  woɗɓe hewtataa  /  wonaale yahuɗo woo gaynata  /  hinaale gayunɗo woo artata  /  yahuɗo woo hino hooloraa  /  o heɓi o heɓaa himo habboraa  /  mo heɓii fehre ka ɗaɓɓere  /  wata accu mawɓe maa e tampere  /  mo yahii haa o hewtii  /  o ɗaɓɓii haa o heɓii  /  o moɓii fow o artii  /  o jommbii haa o darnii  /  o walli siɓɓe o hajji  /  anndu oon ɗon no gayni, arma o ɓeyda wakkilaade fii no o wonira gaynuɗo, o annda kadi ko fii honɗum mi wi’ani wonde jooɗiiɓe bus hino miijii wonde si goɗɗo yahii njananiri o wontay alɗuɗo e mbaadi otomatik.                   

Kuɗol: Muhammad Jan Jalloh, Gine Konaakiri Waanindaraa, mo Donnde Fello

Rokku miijo (coment)

%d blogueurs aiment cette page :