Kawral am e yumma Salamatu Soh, ka jaaɓi-haaɗtirde Mohammed V, Rabat 2017-09-27

Yumma Salamatu Soh, anndiraaɓe Salamatou Sow, wiɗtotooɗo ka jaaɓi-haaɗtirde Ñamee (NIGER), ɗemɗiyaŋke humpitiiɗo fii Fulfulde e Pulaaku, nodditano tawtoreede e bensondiral mawngal waɗngal ka laamateeri Marok, e nder Saare mawnde nden Rabat Jokkito »

Gonal Fulfulde ndeer gannde kese

Fulfulde e gannde kese, ko tiitoonde winndannde nde wiɗtooɓe ɗiɗo (2) misranaaɓe hawtiti winndi, ɓen ngoni : Dr. Aadel Usmaan Imam Ayat, jannginoowo ɗemɗe afrik, to Duɗal Ɗemɗe e Eggo (faculté de Jokkito »

Ciimtol FPU & FPUNA nder Washington: 7, 8 & 9 lewru Morso (July), 2017

Taariika Fulɓe Progressive Union (FPU) ko mojobere daraniinde fiyaakuuji renndo e pinal. Ko e hitaande 1966 nde sincaa e nder Sarlon. Innde mayre aranere nden fewndo nde sincaa ko Fullah Youth Organization Jokkito »

Nafitorgol karallaaji kesi fii jannugol Fulfulde

 Gila internet layi, humindiri jamaaji ɗin, wontuno laawol lumbinirngol miijooji e eɓɓooje, maandinirngol jannde e gannde. Ko e ngol laawol kadi yimɓe ɓen waɗti daɗndirde ngaddamaakuuji maɓɓe e finaa-tawaaji maɓɓe, seɓitoriiɗi mulugol. Jokkito »

Miijo: Yahugol njananiri fii ɗaɓɓere e nguu jamaanu hannde!

Fulɓe wi’i: « Mo haylaaki o haylay hoore ». Ndee tiitoonde yahugol njananiri fii ɗaɓɓere e nguu jamaanu hannde no hitti fota fota, teeŋtinii wonande sukaaɓe wontirɓe hiirnaange Afrika (west Africa), sabu yaltugol fii Jokkito »

 

Mawninen haala men muynaaka kan, ñalnde 21 Fabraa’iru

E hitaande kala, 21 Fabraa’iru on, ko ñalaande mawningol haalaaji muynaaɗi ɗin e nder winndere nden fof (Journée Internationale de la langue maternelle), woni ko suɓanii en nden ñalaande, ko UNESCO e hitaande 1999. Hinde jogitii faandaareeji ɗuuɗuɗi, tawaa e majji: senndodugol weltaare e pine hakkunde ɗemɗe winndere nden…
Ko ɗum waɗi si ndee ñalaande hewtii e hitaande kala, hiɗen haani annditude fii haala men pular-fulfulde kan, annditira-ka haala muynaaka, haala ka Geno yeɗi en, fanndii en enen fulɓe fof.

Hikka 2014 on, ka mawningol haala muynaaka kan, ngesa (blog) mawnba ka internet hino wi’ee Global Voices yowuno winndannde ko yowitii e ndee ñalaande 21 Fabraa’iru, ɓe ɗaɓɓiri hen jamaa on fof  mawningol haala muynaaka mun kan, gooto kala bugoo tweet nden ñalnde ka haala mun, yewta holla nafa dannkitagol haala mun, ɓanngina ko haa honto winndugol haala mun hitti… Ɗum saakitee e winndere nden fow.

Nden winndannde ko e Engele yowiraa, Moodi Abdullay Bah, gooto e feddeeɓe mban ngesa (blog) ƴetti feere heɓɓitii firugol nden winndannde ka ɗemngal farayse, fii yaññugol faandaare nden e farankofoonaaɓe.

Abdullaay Bah, ko pullo Italinaajo mo lesdi Gine, mawɗo dariiɗo daditii e furñito tooñe waɗɗe ka kaso (camp boiro), ɓe sincani ɗum lowre innitiraande konakryexpress.wordpress.com/. Ko ɓe feddeeɓe softuɓe ka lowre Global Voices, ɓe naatuno ton gila hitaande 2008, hiɓe winnda e Italinaare, fira e Engeleere, firta e ɗemɗe goo wano Faransee e ko nanndi.

Ka mawningol haala muynaaka kan e ndee ñalaande 21 Fabraa’iru, Moodi Abdullaay fewtinirno lam lamnde e innde lowre Misiide nden fii ɓeydondirgol ko yowitii e pular ngal ka internet, humpita-ɓe kadi fii lowre am nden Misiide. ekn.  Lamndo ngon ko e faransee waɗiranoo, winndannde nden yowaa ka lowre Global Voices. Miɗo suutana on ɗoo seeɗa e ko men waɗɗiti e ko men yewtidi:

Abdullaay Bah (AB): Tafsir Balde, yewtii men fii maa
Tafsir Balde (TB): Innde am ko Muhammad’Tafsir BALDE
– Wiƴƴitotooɗo e pine e ɗemɗe Afriknaaɓe
-Ngudoowo (bloggeur) winnda e pular, faransee, e Aarabu
-Sincuɗo on lowre Misiide nden fii pular e pulaaku.

Miɗo jogitora ngal ñallal muraadu mmoƴƴuru, ko yowitii e ɓamtaare ɗemɗe men.

AB: Ko woni miijo maa fii ñalaande 21 Fabraa’iru nden?
TB: Ko ñalaande mawnde wonannde men, meneb kippuɓe fii ɗemɗe afrik ɗen. Miɗen weltoo e mayre anndugol wonde ko men tawaaɓe e ɓe fii mun yewtetee ɓen ka ɗuuɗal pine e ɗemɗe.

E siforagol am ɓamtoowo pular, miɗo jogitora ngal ñallal muraadu mmoƴƴuru, ko yowitii e ɓamtaare ɗemɗe men.
E miijo am, haanii ka wallito-ɗen UNESCO fii mawningol ngal ñallal ngal ɓe suɓanii ɗemɗe muynaaɗe ɗen, ɗowtitaɓe e faandaaje maɓɓe. Sabu ngal ñallal hino ɓurta softinnde en daranagol haalaaji men ɗin.

AB: Ko fii honɗum winndataa ka lowre maa Misiide?
TB: Miɗo winnda ton fii pinal, ɗemɗe Afriknaaje, renndo e ko nanndi.

AB: ko haa honto weltor-ɗaa golle maa ɗen?
TB: Miɗo weltii tawde jamaa on hino yiɗi ko mi winndata kon e pular, ɗum ko huunde softinaynde lam ɓurta lam wakkilinde e golle ɗen.

AB: ko sonjaaji honɗi hawrataa e mun ka lowre ton?
TB: ko ko woowaa kon e sonjaaji joomiraaɓe blog en; immorde e nafqugol haa dannkitagol lowre nden. Ko woni tun, menen winndooɓe e ɗemɗe Afriknaaje ɓen, meɗen ɓurora e sonjaa, tawde jannganooɓe lowe amen ɗen ɓen hino fanɗi si eɓɓindiraama e winndirooɓe ɓen ka ɗemɗe lolluɗe.

AB: Hiɗa huutora ɗemngal maa ngal ñannde woo?
TB: Eyyo.

AB: Wano honno?
TB: Ɗum ko e coftale am ɗen yownondiri, ko woni tun e siforagol am koɗo e leydi ndi mi jooɗii e mun ndin, huutorgol ɗemngal am ngal ko ka jaayɗe kumpitorɗe (Media) ɓuri dolnorde (talifon, internet, ekn).

AB: Hol no yiiru-ɗaa ɗemngal mon ngal ko feewi?
TB: Si mi ɓaarorii ko jokkaa e golle fii ɓamtal Fulfulde, mi wi’ay wonde ngal ɗemngal sakkitoray wonde ɗemngal gannde kese.

Timmii.

www.misiide.net

Rokku miijo (coment)

%d blogueurs aiment cette page :