Nafitorgol karallaaji kesi fii jannugol Fulfulde

 Gila internet layi, humindiri jamaaji ɗin, wontuno laawol lumbinirngol miijooji e eɓɓooje, maandinirngol jannde e gannde. Ko e ngol laawol kadi yimɓe ɓen waɗti daɗndirde ngaddamaakuuji maɓɓe e finaa-tawaaji maɓɓe, seɓitoriiɗi mulugol. Jokkito »

Miijo: Yahugol njananiri fii ɗaɓɓere e nguu jamaanu hannde!

Fulɓe wi’i: « Mo haylaaki o haylay hoore ». Ndee tiitoonde yahugol njananiri fii ɗaɓɓere e nguu jamaanu hannde no hitti fota fota, teeŋtinii wonande sukaaɓe wontirɓe hiirnaange Afrika (west Africa), sabu yaltugol fii Jokkito »

Fulɓe e Luumol nder Najeeriya

Joomirawo waddii jamanu ko halli to Fulɓe Najeeriya: Na’i amen keeñi. Iyaalu ɗuuɗi. Ko ɗuuɗi nder sukaaɓe amen accii durngol ngam na’i keppaama – ɓe ngalaa ilmu, ɓe ngalaa sanaa’a, faa woɓɓe Jokkito »

Tawtee e foolotiro tafugol « Meme » ngol ka Ɗemɗe Neeniije

Musiɗɓe tedduɓe, juurotooɓe Misiide, Men hewtidii hannde kadi e kumpital mawngal, kumpital ɓamtaare Fulfulde, e jurol gannde kese. Wano woowiri non, tuma kala, men humpitay on ka ɗemngal men ngal naatiri e Jokkito »

UNESCO humpitii tiitoonde ñalaande winndere ɗemɗe neeniije ɗen 21 Fabraa’iru 2017!

Fii mawningol ñalaande Hakkunde-leyɗeere wonande Ɗemɗe Muynaaɗe Ɗen ñalnde 21 Fabraa’iru 2017, UNESCO, fedde kippunde nden fii ɗuuɗal pine e ɗemɗe.. ka aduna, okkuɓe kadi ñalaande 21 Fabraa’iru nden e hitaande kala, Jokkito »

 

Hoore Fulɓe nden ko Gine woni

Hina wi’eede Seeku Tuure wi’uno, fulɓe ko Mboddi Afrik, hoore nden ko Gine woni, o taƴaynde!. Hay si Seeku Tuure waawaano taƴude hoore nden ne; o tappiinde kam haa nde naawni fota, ko waɗi mi wi’ude noon, ko si en ndaari ngonka fulɓe kan e nder leyɗe Afrik ɓe woni ɗen, en taway alaa ka ɓe mari ɗuuɗal wano ɓe mardi ɗuuɗal Gine non, hiɓe ɗuuɗi limoore, hiɓe jogii marɓe jawdi, hiɓe mari jaŋnguɓe jandeeji ɗin fow, Diina, ganndal, dawrugol e gannde luttuɗe ɗen fow…

Kono ɗun fow haɗaani hiɓe joñii tawo nder Gine, ɓe waawaani laamaade maa tawtoreede e laamiiɓe ɓen! Ɗun ina gasa tawa ko Seeku Tuure raɗinooɓe kon; ina jeya e sabuuji mun.

Seeku Tuure wi’uno, fulɓe ko Mboddi Afrik, hoore nden ko Gine woni, o taƴaynde!

Kono kadi hiɗen foti yiilaade sababuuji goo nder fulɓe ɓen. Si en ndaarii leƴƴi Afrik maa leƴƴi Aduna kan fof, kala heen leñol raɗaangol maa ɓittinaa ka mun, ko ɗuuɗi kon ɓe dartoto ɓe haɓtoo, hay si noon wonaa hare finkaaji nden, maa ɓe haɓto hare jaaynde, woni haalude caɗeele maɓɓe ɗen haa aduna kan fow annda hiɓe tooñaa, waasataa ka ɓe heɓa wallooɓe, hay si ko haala tun noon hin mari nafoore.

Kono si en teskike (teskiima) alaa to fulɓe Gine mari – fotde ko mi anndi kon- fedde daraniinde heɓtugol maa reenugol hakkeeji fulɓe ɗin, ɗuuɗaa hay ko fulɓe Gine ɓen haalata dawrugol. Ko diina tun e huññagol Quraana, e fii no mbuuɗi heɓora woni ka yiliiji maɓɓe ɗin, hay ɗun ne kadi ko gooto bee e hoore mun. Ɗun noon hokkataa leñol tooñangol ina ɓittaa ka mun doole!..

Ɗun ko yeewtuɗen dow fulɓe Fuuta-Jalon (Gine) kon wonaa e maɓɓe tun woni, hina woni e fulɓe ɓen fow, hay si noon ɗun ɓuri laaɓutude ko e ɓeen, ngam ko kamɓe adii tampineede e raɗeede, ɓurnoo haanude ardaade e hare fulɓe nder Afrik, haa tooñe ɓe hawrata ɗen dartoo maa ustoo kam.

Kono fulɓe kala ka ɓe woni ñawu maɓɓe ko ngootu, woni angal marude yi’annde luggiɗude woɗɗunde, e angal rentugol fewjida wallondira, gooto fow ko hoore am hoore am tun.

Si wonaano angal hawrude e waasugol marde hoore wootere; nde Seeku Tuure raɗii fulɓe Gine ndee tun, ɓe haanunoo imminde Tiinde fulɓe, ngam reende hakkeeji fulɓe Gine e fulɓe fow, kala kaɓe woni, kono ɓe waɗaani noon, ko ɗun addi haa laamu Maawuya (Muritani) immanoyi warde e raɗaade fulɓe, ɓeen darino yiɗi haɓtaade, ɓe waɗa ruggooji naatoya nder Muritani, wara Arme, kono ɓe heɓaani wallooɓe, laamu Mali e Senegaal ɓittiniɓe haa ɓe ronki ɓe woppi.

Fulɓe kala ka ɓe woni ñawu maɓɓe ko ngootu, woni angal marude yi’annde luggiɗude woɗɗunde, e angal rentugol fewjida wallondira, gooto fow ko hoore am hoore am tun.

Jooni kadi leyɗe ɗuuɗuɗe nani ɓittina fulɓe nder Afrik. Fulɓe hina ɗuuɗi nder Afrik, hiɓe woni e nder laamuuji, kono ɓe ɗuuɗaa battinde si saɗtendeeji maa hareeji waɗii, addi ɗun e yi’annde am; ko ɓe ɗuɗaa naatude Arme, Polis e sugu ɗiin…

Nde Seeku Tuure raɗii fulɓe Gine ndee tun, ɓe haanunoo imminde Tiinde fulɓe, ngam reende hakkeeji fulɓe Gine e fulɓe fow, kala kaɓe woni, kono ɓe waɗaani noon

Ka lannoode; mi wi’a fulɓe hina haani daranaade ko’e mum en, njaŋngina ɓiɓɓe mum en jaŋde hesere nden, jaŋngude diina hina moƴƴi, kono yo wondu e jaŋde aduna kadi, yo fulɓe naadu ɓiɓɓe mum en Arme, Polis, jannugol e kala golle laamu luttuɗe, ɓe mara kadi lanndaaji polotik, ɓe naata e goɗɗi, ɗun fof tawa hiɓe reeni haala maɓɓe kan, hiɓe jaŋngaka jannaka ɓiɓɓe maɓɓe ɓen, waɗanaka rajooji e teleeji.

Fulɓe hina ɗuuɗi nder Afrik, hiɓe woni e nder laamuuji, kono ɓe ɗuuɗaa battinde si saɗtendeeji maa hareeji waɗii, addi ɗun e yi’annde am; ko ɓe ɗuɗaa naatude Arme, Polis e sugu ɗiin…

Fulɓe hina haani marugol Tiinde fulɓe wootere, marnde calti ɗuuɗuɗi nder aduna fewjidooji, tawa wonuɓe yaasi ɓen wa Orop e Amrik e nokkeeli go, hina jokkondira e pelle (feddeeji) e laamuuji, anndinaɓe ko woni fulɓe, e no fullɓe mardi ɗuuɗal nder Afrik, wallinooɓe reenugol hakkeeji fulɓe ɗin tawa ko e dow jam e ɓuttu.

Si saɗtii haa saɗtii, e hoore Finkaaji (Fetelaaji) ɗin!..

Abdullaay Yerel Soh

Rokku miijo (coment)

%d blogueurs aiment cette page :