Gonal Fulfulde ndeer gannde kese

Fulfulde e gannde kese, ko tiitoonde winndannde nde wiɗtooɓe ɗiɗo (2) misranaaɓe hawtiti winndi, ɓen ngoni : Dr. Aadel Usmaan Imam Ayat, jannginoowo ɗemɗe afrik, to Duɗal Ɗemɗe e Eggo (faculté de Jokkito »

Ciimtol FPU & FPUNA nder Washington: 7, 8 & 9 lewru Morso (July), 2017

Taariika Fulɓe Progressive Union (FPU) ko mojobere daraniinde fiyaakuuji renndo e pinal. Ko e hitaande 1966 nde sincaa e nder Sarlon. Innde mayre aranere nden fewndo nde sincaa ko Fullah Youth Organization Jokkito »

Nafitorgol karallaaji kesi fii jannugol Fulfulde

 Gila internet layi, humindiri jamaaji ɗin, wontuno laawol lumbinirngol miijooji e eɓɓooje, maandinirngol jannde e gannde. Ko e ngol laawol kadi yimɓe ɓen waɗti daɗndirde ngaddamaakuuji maɓɓe e finaa-tawaaji maɓɓe, seɓitoriiɗi mulugol. Jokkito »

Miijo: Yahugol njananiri fii ɗaɓɓere e nguu jamaanu hannde!

Fulɓe wi’i: « Mo haylaaki o haylay hoore ». Ndee tiitoonde yahugol njananiri fii ɗaɓɓere e nguu jamaanu hannde no hitti fota fota, teeŋtinii wonande sukaaɓe wontirɓe hiirnaange Afrika (west Africa), sabu yaltugol fii Jokkito »

Fulɓe e Luumol nder Najeeriya

Joomirawo waddii jamanu ko halli to Fulɓe Najeeriya: Na’i amen keeñi. Iyaalu ɗuuɗi. Ko ɗuuɗi nder sukaaɓe amen accii durngol ngam na’i keppaama – ɓe ngalaa ilmu, ɓe ngalaa sanaa’a, faa woɓɓe Jokkito »

 

Gonal Fulfulde ndeer gannde kese

Fulfulde e gannde kese, ko tiitoonde winndannde nde wiɗtooɓe ɗiɗo (2) misranaaɓe hawtiti winndi, ɓen ngoni : Dr. Aadel Usmaan Imam Ayat, jannginoowo ɗemɗe afrik, to Duɗal Ɗemɗe e Eggo (faculté de langues et de tradition), Jaaɓi-haɗtirde Azhar e Hiba Muhammad Ali, jannginoowo ballito ɗemngal fulfulde, to Duɗal Wiɗtooji Afrik (Institut de recherches et d’études africaines), Jaaɓi-haɗtirde Keer.

Ndee winndannde weeɓitaa, ko e jonnde yuɓɓinanoonde battane ñalaande Pinal ɗiɗaɓere, nde Tabital Pulaagu Leyɗe Arab (TPLA) yuɓɓinno ñannde 04/04/2017 to leegal Jamaalik, keer, galle Jaami’a Afrikiya.

Winndannde nden hawruno e ɗeri 35, nde adinntiniraa yewtere juutunde fii ganndal ɗemɗiyaagal hiiso. E nder heen, ɓe ardiniri tiitoonde nden lamde, hino jeyaa e majje : No geɓal Fulfulde ngal foti ka gannde kese ?

Ado ɓe toppitaade wiɗto ngon, ɓe maandinno wiɗtooji aditiiɗi feeñude (yaltude), ɓe holli wonde, yeru ko ɓe wiƴƴitii kon, ɓe hawraali e wiɗto huuɓitungo ndee tiitoonde winndannde maɓɓe, si wanaa ko Muhammadu Tafsir Balde yaltini e jaaynde Qiraat African, o tiitori ɗum : « Ɗemɗe Afriknaaje ɗen ka teknoloji keso », toŋngoode 26, 2015. O yowi kadi winndannde yowitiinde e gonal fulfulde ngal ka teknoloji ka lowre ar.misiide.net (e Arabu).

Ko e njaltudi (result) wiɗtooji Tafsir Balde ɗin woni ko ɓen misranaaɓe ɗiɗo mahii ɓe waɗi winndannde maɓɓe nden, ɓe ɓeyditi ko hesɗi kon e wiɗtooji makko ɗin tippude e internet on.

Miɗo ñoggana en les ɗoo, seeɗa e ko mi suuti e ngon wiɗto maɓɓe 

Ɗemɗe Afrik ɗen e Teknoloji Hiiso on :
E fewndo men hannde, teknoloji keso on hino wallitora daɗndugol ɗemɗe seɓitoriiɗe ɗen mulugol ; teŋtinii non ɗemɗe afrik ɗen. Tawde non faandaare hiiso ɗen, wanaa newingol jokkondiral maa wurnitirgol ɗemɗe ɗen poroguraamuuji seertuɗi tun haaɗi, ko woni tun, hinde wallitora kadi daɗndugol ɗemɗe ɗen mulugol, fewndo ka ɗemɗe goo ɓamtorii laawi jokkondire seertuɗi.

Eɓɓooje teknoloji on e wiɗtooji nokkuuje (études de terrain) ɗin hino wallitoraade faabagol ɗemɗe seɓitoriiɗe mulugol ɗen poroguraamuuji hiiso « ngam no ɗe laatora ɗemɗe gannde e winndere saakitiiɗe » .

wano wiɗtotooɓe ɓen yi’iri non, ko anngal naatugol humondirgol e gannde kese ɗen woni sabu mulugol ɗemɗe ɗen.

Ko eɓɓoore GOOGLE nden fii ɗemɗe seɓitiiɗe ɗen, faandoriinde deftinngol (documentation) ɗemɗe 3500 e nder duuɓi 100 , e eɓɓoore UNESCO wi’eteende nden « gannditi winndere nden » (MEMORY OF THE WORLD) , woni eɓɓooje ɓurɗe mawnude fii wallitorgol saakitude ɗemɗe suuɗiiɗe ɗen porogaraamuuji hiiso.

Huunde gasaynde reenugol ɗen ɗemɗe, ɓamtira fii majje e gollodal woowaangal e majje… wano wiɗtotooɓe ɓen yi’iri non, ko anngal naatugol humondirgol e gannde kese ɗen woni sabu mulugol ɗemɗe ɗen.

Ɓaawo ɗum, ɓe weeɓituno geɓal fulfulde ngal ka gannde kese wano Tafsir Balde winndirnoo non fii gonal ɗemɗe afrik ɗen ka gannde kese, ɓe ɓeyditi kon ko hesɗi e mun, ɗin ngoni :

1- Lowre lexilogos nden ka fulfulde, tawde jaaɓnirɗe kese ɓeyditaama ton, wano tappirɗe ɗemɗe afrik ɗen.
2- Fammpegol hello facebook ngon ka Fulfulde.
3- Wondiigu  (communauté) Scrabble 3D , ngun naadu ngu ɗemɗe jeegoo afriknaaje haa fewndo hannde, hino jeyaa e majje, ɗemngal Fulfulde ngal.

Ɗemngal Fulfulde ngal ka Teknoloji Hiiso
Ɗemngal Fulfulde ngal ko gootal e ɗemɗe afrik saakitoriiɗe no yaajiri e dunngal ngal. Hingal layiri gila ka hakkundeere dunngal ngal fuɗɗori Moritani e Senegaal ka hiirnaange haa hewtoya Sudan teleren Niilu . Wowlooɓe ngal ɓen hino sennditori leyɗe ɗuuɗuɗe afrik, wano  ndenndaandi Gine Konaakiri, Senegaal, Mali, Burkina Faso, Gambia, Saraliyon, Niijer, Moritani, Naajeeria, Gine Bisaw, Gana, Bene, Koddiwar, Kamaru, Caad, Afrik Santaral, Gaboo, Gine Ekuwatorial, Kongoo (Zayr – RDC), Sudan e Ecopii .

Ko ɗum waɗi si tawii hingal jeyaa e ɗemɗe yaajuɗe, sifitorɗe pine ɗuuɗuɗe sabu ko ngal (ɗemngal) kawtidi kon e leƴƴi hoɗidiiɓe maggal. Ko ɗum kadi waɗi ngal misal feerewal gasay-ngal waɗde ngal hakkunde ɗemɗe hiiso e jaaɓnirɗe (app) seertuɗe ɗen kañum e poroguraamuuji cinndoy (smartfoon).

Ko e ɗum woni ko fulɓe tiiɗnoriiɓe daɗnugol ɗemngal maɓɓe ngal wakkilori ɓamtugol saakitira ɗemngal ngal ka gannde kese, ɓe jokkondira e kawtite mawɗe… haa Fulfulde nden hewtiri fewndo hannde e martaba toowuɗo, nde ñiiɓiri poroguraamuuji e jaaɓirɗe seertuɗe, jaŋto-ɗen yoga e majji :

Geɓal Fulfulde ngal ka teknoloji keso hino lo’i si eɓɓindiraama e ɗemɗe afrinaaje goo

– Tappirde Fulfulde nden : hinde mofti alkule ɗen fof, teŋtinii heeroriiɗe ɗemngal ngal, ɗum woni sabu newingol huutorde ɗemngal ngal e poroguraamuuji seertuɗi ɗin fof sabu darnde fulɓe ɓen e jananɓe goo.

– Fampeede yamre wanngorde Mozilla Firfox e Pulaar-Fulfulde nder hitaande 2012 nden, e tiiɗnaare Ibrahiima Saar gila o fuɗɗinoo fulude kelmeendi wanngorde Firfox nden hitaande 2009, fulɓe waawi huutorde wanngorde nden ka ɗemngal maɓɓe .

Ko fulaa kon e gannde kese ɗen feƴƴaa Firfox, Skype, e Facebook wondude e jaaɓnirɗe smartfoon goo.

– Eɓɓooje goo hino jokkiraa hiirnaange afrik, wano yaltinde smartfoon e Fulfulde sugu Android e yuɓɓu IOS mo Apple heerori.

Tippude e ɗum, hino gasa wi’ude wonde geɓal Fulfulde ngal ka teknoloji keso hino lo’i si eɓɓindiraama e ɗemɗe afrinaaje goo, wano Swahili, Afrikaans e Hawsa, tawde ko fulaa kon e gannde kese ɗen feƴƴaa Firfox, Skype, e Facebook wondude e jaaɓnirɗe smartfoon goo.

Ɗee golle ɗoo fof ko e poroguraamuuji dokke (open source) fawii, ɗum le hoynataa fii naatugol ɗemngal ngal ka teknoloji keso .

Ko wano non kadi loowdi fulfulde ndin ka wikipedia hino famɗi si ndi eɓɓindiraama e Afrikaans maa Swahili e piide misal. Hawnaaki hara sabu on ko ko tawi kon golle ɗen ko e yarlitaare fawii, kadi ko feere feere wonaa e gollireede.

Ko goonga, Ibraahima Saar hino jokki ko tiiɗi fii fulugol poroguraamu Scrabble3D on gila o fuɗɗii jokkondirde e wondiigu ngun 2013, o ɗaɓɓiriɓe wallitorgol fulude poroguraamu on. Ɗum e ɗum mun, haa hannde fulfulde nden waawaali naatude ton, wano no wiɗtooɓe ɓen ɗiɗo waɗtirani yiila non.

Tafsir Balde hino joopoo e tiɗnaareeji ɗi Moodi Bokor Bah en, e Moodi Omar Bah kañum e Ibraahiima Saar e woɗɓe goo jokki fii newinngol naatude fulfulde nden ka teknoloji keso, kono ɗin fof ko tiɗnaareeji feere-feere haanidu-ɗi e golle jamaa fii ɓamtugol fulfulde nden.

Yowre :
Ko haa wa ɗoo waawu-ɗen ñoggude winndannde Dr. Aadel Usmaan Imam Ayat e Hiba Muhammad Ali nden, en tinii ɓe waɗii tiɗnaare mawnde, ɓe wiƴƴitike ka haani ton fof fii humpitugol en haa ka fulfulde nden fewndori ɗon e teknoloji keso on.

Ɓaawo ɗum, miɗo yiɗi waɗde ɗoo fensitannde e yoga e toɓɓe ɗe ɓe joopii, ngam ɓurtugol laɓɓinnde ko joli kon e winndannde nden.

Fewndo hannde, mo yewtay fii ɗemngal fulfulde ngal ka teknoloji keso, ko maa o ɓeyditora winndanɗe yowaaɗe ɗen ka lowre misiide, sabu hiɗe feŋsiti ko ɗuuɗi e nden toɓɓere, wano ardata les ɗoo:

Geɓal Fulfulde ngal e Kuutorɗe sappo enternet

E ko ɗemngal men ŋakkiri ka gannde kese?

Ñoggannde yewtere am nden Misra: « Pulaar e Teknolooji keso »

Ciimtol ñalaande Pinal 1: « Ɗemngal e Pinal Pulaar e ɗemɗe Afrik goɗɗe », keer 24/02/2015

Gine: Gannde kese ɗen, ko kutu ɓamtirɗo ɗemɗe ngenndiije ɗen

Gine: Pular e Maninka naadaama ka dunce Guinee Vote

Miɗo tamƴinii kala ndaartu-ɗo ɗee jokkorɗe yawtuɗe dow ɗoo, o heɓay kumpite yowondirɗe e ko gebal Fulfulde ngal ka gannde kese.

Rokku miijo (coment)

%d blogueurs aiment cette page :