Nafitorgol karallaaji kesi fii jannugol Fulfulde

 Gila internet layi, humindiri jamaaji ɗin, wontuno laawol lumbinirngol miijooji e eɓɓooje, maandinirngol jannde e gannde. Ko e ngol laawol kadi yimɓe ɓen waɗti daɗndirde ngaddamaakuuji maɓɓe e finaa-tawaaji maɓɓe, seɓitoriiɗi mulugol. Jokkito »

Miijo: Yahugol njananiri fii ɗaɓɓere e nguu jamaanu hannde!

Fulɓe wi’i: « Mo haylaaki o haylay hoore ». Ndee tiitoonde yahugol njananiri fii ɗaɓɓere e nguu jamaanu hannde no hitti fota fota, teeŋtinii wonande sukaaɓe wontirɓe hiirnaange Afrika (west Africa), sabu yaltugol fii Jokkito »

Fulɓe e Luumol nder Najeeriya

Joomirawo waddii jamanu ko halli to Fulɓe Najeeriya: Na’i amen keeñi. Iyaalu ɗuuɗi. Ko ɗuuɗi nder sukaaɓe amen accii durngol ngam na’i keppaama – ɓe ngalaa ilmu, ɓe ngalaa sanaa’a, faa woɓɓe Jokkito »

Tawtee e foolotiro tafugol « Meme » ngol ka Ɗemɗe Neeniije

Musiɗɓe tedduɓe, juurotooɓe Misiide, Men hewtidii hannde kadi e kumpital mawngal, kumpital ɓamtaare Fulfulde, e jurol gannde kese. Wano woowiri non, tuma kala, men humpitay on ka ɗemngal men ngal naatiri e Jokkito »

UNESCO humpitii tiitoonde ñalaande winndere ɗemɗe neeniije ɗen 21 Fabraa’iru 2017!

Fii mawningol ñalaande Hakkunde-leyɗeere wonande Ɗemɗe Muynaaɗe Ɗen ñalnde 21 Fabraa’iru 2017, UNESCO, fedde kippunde nden fii ɗuuɗal pine e ɗemɗe.. ka aduna, okkuɓe kadi ñalaande 21 Fabraa’iru nden e hitaande kala, Jokkito »

 

Gelo-den Sonna Fooli Bah (Folly BAH THIBAULT), ka Aljazeera English

Ko non tigiri woniri, fii Fooli BAH, ko yo en gelodo! Sabu non sonnaajo on hino suuɗitii gila ko ɓooyi. Wikipediya e hoore-mun yewtaali ko ɗuuɗi fii oo sonnaajo gooto. Ɓe wi’u tun wonde «Fooli Bah Thibault ko jaayndiyankeejo gollanoowo Aljazeera fewndo ɗoo». Ɓe ɓeyditi ɗon seeɗa ɓe wi’i : «O gollanii France 24 ka Une semaine en Afrique, fewndo maanditaare jowaɓere sinceede France 24 nden, Fooli Bah yaltituno e tintorngal jaaynde nden himo rokka kumpite».

Ko ɗum ɗoo tan hello wikipediya ngon heɓi ko yewta fii Fooli Bah! Sabu on ko tawde debbo on ko suuɗitinooɗo, o jaɓataano yeeɓitude fii ngurdam makko ɗam e kene. Himo jokki golle makko e nguradam makko.

Ɗum e ɗum mun, fidduɓe goo wiƴƴitino ɗaɓɓiti fii oo banndiraawo lolluɗo, ɗum e wonde ɓe yewtaali ko yoni molon! Wano lowre palabre-infos nden maandiri non e winndannde maɓɓe yowanoonde ñannde 04 Suwen 2011. Ɓe tiitori artiikil on «Folly Bah Thibau, la guinéenne qui présente le JT à Al-jazeera», e maana : Fooli Bah Thibau, debbo ginenaajo jonnoowo kumpite ɗen Aljazeera.

Ka raɓɓindingol, innde sonnaajo on hino heewi tef ka jowlol enternet, tappee tun Folly Bah hewɗo-ɗen, ma on tinu dinngire ko yewti fii makko. Kono ɗen e ɗuuɗude ko seeɗaaje heɓi ko yewta en fii oo banndiraawo men tedduɗo; sabu suuɗitagol makko, o yaltinaali deftel o winndaali artiikil ko yowondiri e ngurdam makko. Ko yeru ko o lamndaa woo, o yewta fii jannde makko nden e ligge makko ɗen ka jaayɗe windereyankooje; wano RFI, France 24, Aljazeera e ko nanndi.

Nde men anndunoo fii oo Pullo musiɗɗo men, yette Baajo mo Fuuta Jaloo (Gine), hino lolliri nii ka njanane, men tawno ko maa men wiƴƴitoo fii makko, men anndina janngooɓe amen tedduɓe ɓen Misiide; wonde ko nenndi men woni sonna Fooli Bah.

Folly Bah

Sonna Fooli Bah, ka ganngunal Aljazeera English

Wiƴƴito amen ngon wa’uno wa ɓeya aditinooɓe men, men heɓaano ko men yewta fii sonna Fooli Bah hara koko yoni molon. Ko woni tun, men hawruno e widiyoo mo iommigration saakiti ñannde 16 deesaambur 2013 battane yewtere yuɓɓanoonde Amerik fii fergu e ferooɓe e tiitoonde « Migrants’ Voices« .

Fooli Bah nodditaa e ngal kawral, o suɓaa yiilooowo nden yewtere (moderateur), o yewti ko yahata mintaaji noogaas (20’). E nder hen, o yewtori fii ngurdam makko ɗam ; e lasli makko ndin, e diina makko kan e toɓɓe heewuɗe nafooje; yowondirɗe e ngurdam makko.

Misiide nden kadi mahii e ɗin konguɗi makko ɗon; fii ko yetwa janngooɓe mun ɓen ko yowondiri e sonna Fooli Bah. E hino ko men waawunoo maandinde kon:

Fooli Bah wuuɗay Engele e Faransi (Ko men naniri mo), o maandinii ka hello makko Link Den wonde o wowlay kadi Fulfulde.

Innde Makko : Ko Fooli Bah Thibault, jaayndiyanke (Journaliste), himo golla Aljazeera lesdi Katar ka saare mawnde Dawha.

Ko o ɓaleejo, Afriknaajo, sonnaajo, julɗo, ko ɓe sappo e jeeɗiɗo (17) ka ɓeynguure maɓɓe. Ɓe waɗii lesɗe jeeɗiɗi (7). Himo wowla ɗemɗe jowi (5) tawaa e majje Fulfulde.

E wi’I makko: “Setagol yalta ngol hino newnane anndugol jamaa on, ɓeydane hakkil, wonane soktirgal yaajeende”.

Ɓeynguure makko nden yaltuno faɓtoyii njananiri hitaande 1980 sabu ella faggudu (économique) e dawwrugol (politique) ko dabbunoo Gine fewndo on saa’i.

Hitaande ɓawti ɗum, e 1981, laamu njaggu ngun gine (fewndo Seeku) nannguno ben makko en kasi-ɓe Camp Boiro e innde dawrugol.

Nde fii ɗum yawti, mawɓe makko ɓen faalanaamo kanko e banndiraaɓe makko ɓen nguradam yaaju-ɗam; ka jannde heɓotoo hara wanaa sugu lagine e jannugol mun ɗemɗe lesdi ndin.

Ko down den faandaare woni ko ɓe huccitiri nayrobii (keniyaa) hitaande 1987 e lesdi ndi ɓe anndaa huunde e fii mun; ɓe ɗigginaa haala lesdi ndin.. O woniri non ginenaajo jooɗiiɗo keniya.

E konngol makko: “Ferugol ko huunde saɗtude muusunde, ɗum majjinay ñeeñal  neɗɗo on, waɗɗina e makko ɗaɓɓugol laawi kesi no o soktinara e nder nguradam ɗam”.

Ko non o wuuriri keniya haa no o setorii non kadi Washintoon hitaande 1996, ɗum non ko nde mawɓe makko ɓen naɓirnoomo ton fii ɓeydugol ganndal.

Folly Bah

Fooli Bah ka gangunal Aljazeera, himo hollita maayde Nelson Mandelaa

Fooli Bah hino jonna kumpite ka  Aljazeera English, himo kippi kadi fii poroguraamu jaaynde nden hino noddiree “Talk to Aljazeera”. Ko poroguraamu kippuɗo kawre e lamndo (interview) e nder winndere nden. O tintodii e kummaluuɓe ɗuuɗuɓe e nder winndere nden.

Amerik ton non, ko nguradam feere jam goo o feƴƴini. Tawno ko maa o golla o janngora. “O yahay ka duɗal bimbi, ko sakkitora ka golle kiikii”.

O waɗi Amerik duuɓi jeegoo; himo golla o jannga ka duɗal mawndal haa o heɓi kaydi fii ganndal “Communication” e jaaynde.

E hitaande 2004, o feriri lesdi Faransi ka o resaa (jombaa) ɗon e juuɗe Faransiijo mo Senegaal. Hawnaaki hara ko on jogii ndee yettoore THIBAULT  nde o ɓeyditi ka innde makko!

Hannde hannde, himo jooɗii Dawha e nder Katar ka Aljazeera English. Golle o heɓii, jaahu, jawdi, e dewgal wondude e ɓiɓɓe makko ɓen.

Kono ɗum e ɗum mun, himo miijoo fii Gine ka lasli makko, ka iwdi makko. O holli wonde Jamaa on lamndoto-mo ka ɓe iwri, tawa moodi makko ko Faransiijo mo  Senegaal, ɓiɓɓe ɓen wano-non, kono non kanko on ko gine woni iwdi makko ndin. “Sabu ko ɗon ɓeynguure makko nden woni”.

Fewndo hannde, Fooli Bah hino jonna kumpite ka  Aljazeera English, himo kippi kadi fii poroguraamu jaaynde nden hino noddiree “Talk to Aljazeera”. Ko poroguraamu kippuɗo kawre e lamndo (interview) e nder winndere nden. O tintodii e kummaluuɓe ɗuuɗuɓe e nder winndere nden.

No wi’ir-ɗen non, Fooli Bah wuuɗay Engele e Faransi (Ko men naniri mo), o maandinii ka hello makko Link Den wonde o wowlay kadi Fulfulde.

Calminaali,

Tafsir BALDE

Mo Misiide Network

www.misiide.net

www.misiide.net/ar

 

 

 

Rokku miijo (coment)

%d blogueurs aiment cette page :