Gonal Fulfulde ndeer gannde kese

Fulfulde e gannde kese, ko tiitoonde winndannde nde wiɗtooɓe ɗiɗo (2) misranaaɓe hawtiti winndi, ɓen ngoni : Dr. Aadel Usmaan Imam Ayat, jannginoowo ɗemɗe afrik, to Duɗal Ɗemɗe e Eggo (faculté de Jokkito »

Ciimtol FPU & FPUNA nder Washington: 7, 8 & 9 lewru Morso (July), 2017

Taariika Fulɓe Progressive Union (FPU) ko mojobere daraniinde fiyaakuuji renndo e pinal. Ko e hitaande 1966 nde sincaa e nder Sarlon. Innde mayre aranere nden fewndo nde sincaa ko Fullah Youth Organization Jokkito »

Nafitorgol karallaaji kesi fii jannugol Fulfulde

 Gila internet layi, humindiri jamaaji ɗin, wontuno laawol lumbinirngol miijooji e eɓɓooje, maandinirngol jannde e gannde. Ko e ngol laawol kadi yimɓe ɓen waɗti daɗndirde ngaddamaakuuji maɓɓe e finaa-tawaaji maɓɓe, seɓitoriiɗi mulugol. Jokkito »

Miijo: Yahugol njananiri fii ɗaɓɓere e nguu jamaanu hannde!

Fulɓe wi’i: « Mo haylaaki o haylay hoore ». Ndee tiitoonde yahugol njananiri fii ɗaɓɓere e nguu jamaanu hannde no hitti fota fota, teeŋtinii wonande sukaaɓe wontirɓe hiirnaange Afrika (west Africa), sabu yaltugol fii Jokkito »

Fulɓe e Luumol nder Najeeriya

Joomirawo waddii jamanu ko halli to Fulɓe Najeeriya: Na’i amen keeñi. Iyaalu ɗuuɗi. Ko ɗuuɗi nder sukaaɓe amen accii durngol ngam na’i keppaama – ɓe ngalaa ilmu, ɓe ngalaa sanaa’a, faa woɓɓe Jokkito »

 

Geɓal Fulfulde ngal e Kuutorɗe sappo enternet

Banndiraaɓe tedduɓe, fewndo hannde, giɗo Fulfulde fow hino haani anndude wonde ɗemngal ngal naatiino e gannde kese ɗen, hingal jokki kadi naatugol e teknolooji keso on, hay si tawii non ɗuuɗaali ko waɗaa taho.

E ndee winndannde men ɗoo, men hollay on kuutorɗe (outils) firaaɗe e ɗemngal Fulfulde, ngam haali-pulaar jo kala heɓa ko wallitora.

E oo aduna mo gannde kese, alaa ko ɓuri fotude haa ɓura heɓugol teknolooji on e haala mun.

E hino ɗoo kuutorɗe firaaɗe ɗen e Fulfulde:

  • Duce Foundation Mozilla ɗen e Fulfulde:

Hannde si no woodi ko mawtoren e ɗemngal Fulfulde ka gannde kese, ko wano nduungu (foundation) Mozilla! Tawde non gila wangorde (navigateur/browser) Firefox nden firaa e Fulfulde, kañum Mozilla hino jokki (e ballal Ibraahima Saar) no ɗemngal ngal heɓira geɓal e dunce (services) maɓɓe ɗen fof.

  • Fewnde hannde, wano cinndel (mobile phone) ZTE OPEN naadii Pulaar ka njuɓɓude Firefox OS[1]. Ɗum Ko yuɓɓo huuɓnungo ndognoowu cinnde smartfon (nanndo mum ko Android walla IOS). Mo soodii ngel cinndel Firefox OS saatiingel yaltude ko neeɓaa, o taway ton ɗemngal Fulfulde.
  • Firefox mo Android : Ɗum ko wangorde Firefox nden e Pulaar.
  • Lowre Firefox OS nden e Pulaar: nde talifon/cinndel Firefox ngel tafaa lanni, lower/wonirde (site) hertinanano kañum talifon on fii humpitugol jamaa on no o fewndori, walla no heɓorta. Ɗemngal Fulfulde ngal heɓuno geɓal e ɗen lowe hertinanaaɗe Firefox OS ɗen[2].

Ɗee duce jantaaɗe dow ɗoo fow hino okki Pulaar geɓal e innde nduugu Mozilla.

  • Tappirde (clavier) Pulaar e cinndel Android:

Kala jogiiɗo talifon Android, himo waawi aafde (installer) tapirde Pulaar nden ka cinndel makko, o waɗta winndirde Pulaar e talifon makko on. Ƴeewee ɗoo ndaaron.[3]

  • Google e Pulaar : ko neeɓaali koo, google translation naaduno ɗemɗe Afrik jowi ka duncal mun, ɗen woni: Somaliya, Hawsa, Yoruba, ibgo, e Zulu. Gila ɗum waɗi, yarlitiiɓe men goo hino jokki fii Pulaar kadi heɓira geɓal ka Google Translation, ɓe firii ko ɗuuɗi e duncal ngal, hiɓe jokki haa jooni golle.

Ko wono non en anndintinay wonde Fulfulde hino tawaa e ɗemɗe seeɗaaje suɓaaɗe fireede e ɗemɗe gog=o (wano Engele) ka lowre Mokenon.[4]

  • Wikipedia e Pulaar : Ɗum e wonde loowdi (contenu/content) Fulfulde ndin ka Wikipedia hino barkini hakkunde ɗemɗe Afrik ɗen !
  • Loowdi Pulaar ndin ka lowre amaGama.locamotion.org: Miɗo waawi wiide ko e ndee lowre woni ko loowdi Fulfulde ɓuri ɗuuɗude ! Asli mayre on ko e Engele, kala helmere jeyaande e gannde kese nde ɗaɓɓataa firo mun e Pulaar, lamdo ndee lowre AmaGama Locomotion, ma a heɓu firo mun ko laaɓi pos.
  • Eɓɓoore Pootle : Ɗum ko eɓɓoore nde Dwayne Bailey, fii firgol gannde kese ɗen e ɗemɗe winndere nden, eɓɓoore nden hino fira wano tafirɗe Free Minde, File Zila, WordPress e ko nanndi. Fulfulde firaama ɗon ko yahata 66 %, tawde ko Fulfulde woni yeeso ɗemɗe Afrik ɗen fof e ngal duncal !
  • Eɓɓoore Transifex : Ndee ɗoo kadi lowre hino kippi fii firtugol gannde kese e filmuuji ɗin ekn ka ɗemɗe winndere nden, ko e ndee lowre woni ko sakkere (fichier) VLC e Skype nden adaa fireede. Ko e dee lowre fahin woni ko mi jokki firugol Media Player Classic, mi firii ko ɓuri feccere nden.
  • Pulaar ka dunce « Boîte à innovations »: « Boîte à innovations » ko eɓɓoore nde Tony Simard, mo Kanadaa, nde sincaa e 2013 on e faandaare yottinirgol gannde kese ɗen e laawol ɗemɗe Afrik ɗen. Eɓoore nden hino mari dunce ɗuuɗe, wano: Ganndal hiisa (mathématique), informatik, e huutorɗe enternet, e ko nanndi.

Ɗum ɗoo fow ko e ɗemɗe Afrik jowi firaa, ɗen woni: Fon, baatonu, Yoruba, Julaa, Wolof, e Fulfulde[5].

  • Jaaɓnirɗe (applications) Pulaar: Yeru ko mi wiƴƴitii kon, mi hawraali e jaaɓnigal woo si waa Jaaɓirgal terminolooji Hausa-Fulfude-Kanuri. Tafiraangal fii firugol kelme Engele ɗen e ɗee ɗemɗe Afrik ɗon tati.

10-Geɓal Fulfulde ngal ka eɓɓoore “Tweet in your language”: Gila hitaande 2014, lowre Global Voices nden fampino duncal mawngal battane ñalaande mawningol ɗemɗe neeniije ɗen (Mother Language Day), mawninteengal hitaande kala e lewru Fabraa’iru ñannde 21 ngam neɗɗo kala winnda e ɗemngal mun, o anndina winndere nden fow ko haa honto winndugol ɗemngal mun ngal hitti..

wano ndee hitaande hikka (2015), ko Pulaar ɓurnoo heɓude Tweete fampaaɗe ! Naatee tun www.twitter.com winndon ka ɗaɓɓitirgel ɗum ɗoo #MotherLanguage maa #Fulfulde #Pulaar #Fulah, on taway ɗemngal ngal heɓii loowdi seeɗa ka dinngiral renndo Twitter!

[1] Humpitoree ɗoo fii cinndel ngel 

[2] E hino nde ɗoo

[3] Naatee ɗoo

[4] Ndaaree ɗoo

[5] E hino lowre duncal ngal 

9 Responses to Geɓal Fulfulde ngal e Kuutorɗe sappo enternet

  1. A haalii googa musiddo yo Alla 6amtungal 6amta 6i66e maggal

  2. Alimu Barrie dit :

    No moji haa yo alla wallu en ko fulbeben wonii a la e jaabhu de demgal ngal sinadhun hanno joni dhun fof wawama

  3. Aboubacry Ba dit :

    Yoo 6i66e ful6e njokku golle gila e anndu6e haa e dañ6e gooto fof yoo addudu ballal mbela so sukaa6e men ngaroyii maa taw ko heewi gollaama en njetti harallee6e hatantee6e faññanii6e leñol ngol ngam firde gannde kese ze way6e no Ibraahiima M Saar en…

  4. On jaraama sanneh. Yoo Allah Bamtu Demngal Pulaar e FulBe.

  5. Oumar Diallo dit :

    Yo ALLA wallitir cellal!

  6. Usmaan Bah dit :

    Yo Allah wuurnu daraniiɓe leñol haa juuta yottoo fa’ndaare maɓɓe.. ..

  7. Abdullaay Soh dit :

    On jaarnaama dee moodi en, ligge mon no labaa moƴƴa noon!

  8. Thierno Sow dit :

    on jaaraama fota Ceerno

  9. abdurahmaane dit :

    Moodi on jarnaama menen kadi men wadhaye yeru amen on .dhun ko janngugol faama ko wonaa janneede kon

Rokku miijo (coment)

%d blogueurs aiment cette page :