Kawral am e yumma Salamatu Soh, ka jaaɓi-haaɗtirde Mohammed V, Rabat 2017-09-27

Yumma Salamatu Soh, anndiraaɓe Salamatou Sow, wiɗtotooɗo ka jaaɓi-haaɗtirde Ñamee (NIGER), ɗemɗiyaŋke humpitiiɗo fii Fulfulde e Pulaaku, nodditano tawtoreede e bensondiral mawngal waɗngal ka laamateeri Marok, e nder Saare mawnde nden Rabat Jokkito »

Gonal Fulfulde ndeer gannde kese

Fulfulde e gannde kese, ko tiitoonde winndannde nde wiɗtooɓe ɗiɗo (2) misranaaɓe hawtiti winndi, ɓen ngoni : Dr. Aadel Usmaan Imam Ayat, jannginoowo ɗemɗe afrik, to Duɗal Ɗemɗe e Eggo (faculté de Jokkito »

Ciimtol FPU & FPUNA nder Washington: 7, 8 & 9 lewru Morso (July), 2017

Taariika Fulɓe Progressive Union (FPU) ko mojobere daraniinde fiyaakuuji renndo e pinal. Ko e hitaande 1966 nde sincaa e nder Sarlon. Innde mayre aranere nden fewndo nde sincaa ko Fullah Youth Organization Jokkito »

Nafitorgol karallaaji kesi fii jannugol Fulfulde

 Gila internet layi, humindiri jamaaji ɗin, wontuno laawol lumbinirngol miijooji e eɓɓooje, maandinirngol jannde e gannde. Ko e ngol laawol kadi yimɓe ɓen waɗti daɗndirde ngaddamaakuuji maɓɓe e finaa-tawaaji maɓɓe, seɓitoriiɗi mulugol. Jokkito »

Miijo: Yahugol njananiri fii ɗaɓɓere e nguu jamaanu hannde!

Fulɓe wi’i: « Mo haylaaki o haylay hoore ». Ndee tiitoonde yahugol njananiri fii ɗaɓɓere e nguu jamaanu hannde no hitti fota fota, teeŋtinii wonande sukaaɓe wontirɓe hiirnaange Afrika (west Africa), sabu yaltugol fii Jokkito »

 

Fii gelagol Misiide Ɓamtaare

Hunorde
Misiide Ɓamtaare, ko lowre ɓamtal diina e pinal ka ɗemngal pulaar/fulfulde, nde sincaa ko ñannde 01/01/2013 nde fuɗɗii golle e lewru fabraa’iru (Colte) ndun.

Ko tawde hari lowe pulaar e ɗuuɗude ka jowlol enternet, lowre hertinanaande fii diina tan woodaaka ; si men eɓɓi fampagol Misiide Ɓamtaare, ngam haali-pulaar en heɓa ka jannga fii diina, e pine wondude e gannde kese, e ko nanndi.

Lasli innde inden
Innde lowre men nden ko e Misiide woni ko eggaa, innde lollunde fuuta Jaloo, anndirteende innde nokkuure ka juulirde mawnde nden woni ɗon, ɓe wi’a ɗum: “Ka misiide”. Misiide non ko ɗaɗol eggaangol e Arab Masjid (juulirde). Tawde non lowre men nden ko fii diina e pinal ɓuri dolnorde, waɗi si men suɓii ndee innde Misiide Ɓamtaare.

Geɓe Misiide nden
Misiide Ɓamtaare hina jogii geɓe ɗiɗi e lowe fewndo ɗoo, ko kanje woni les ɗoo :

1. Misiide Pulaar nden :
Ko kayre woni lowre lasliire nden, ko ɗon kala huunde yowondire e pulaar/fulfulde walla laten (faransiire, engeleere, ekn) yowetee, immorde e winndannɗe haa e ko nanndi. Jokkorde mayre nden ko nii : www.misiide.com

2. Misiide Arab nden :
Fii ka musiɓɓe men fulɓe e yiɗuɓe pine fulɓe tawayɓe ɗigginaa pulaar ngal fotta, ɓe jannga winndannɗe Misiide nden e ɗemngal Arab. Ko wano non kadi fii ka defte mawɓe men ɓen yeeɓee dankitee, tawde geɓe ɗuuɗuɗe e ɗen defte ko e Arabu winndiraa. Jokkorde ngal geɓal Misiide Arab ko nii : www.misiide.com/ar
Ko ɓeyditugol tun ɗum ɗoo /ar yeeso lowre lasliire nden www.misiide.com

Dunce Misiide ɗen
Misiide Ɓamtaare hina jogii noone ɗiɗi e dunce: Ko dunce daɓɓe (Court terme), e dunce woɗɗuɗe (long terme).

1) Dunce daɓɓe ɗen:
1. Misiide Defte:
Wallifaade Saggitorɗe (dicos), ñaldinkooje (calendrier), Terminolooziiji, defte diina e pine fulɓe, defte gannde kese (informatique), e ko nanndi.

2. Misiide Media:
Himo peccii ɗiɗi: Widiyoo (mbodo) e ojoo. Ko ngal duncal woni ko kippata yaltinnde kasetaaji jewte diina e pine (bayaanaaji, taali e tinndi, naamuuji fulɓe ekn), e tinndinooje (tutoriels) gannde kese, e tafude ɓeɗi (cd) e fannu kala, e ko nanndi.

2) Dunce woɗɗuɗe ɗen
3. Misiide duɗal:
Miijo fii sincude duɗal jannginirgal diina e pulaar, hinde peccii ɗiɗi kayre kadi: Wootere nden ko ka enternet, ndeya nden ka yaasi si Alla muuyii.

4. Misiide Magazine
Ngam yaltinnde ɓatakal (journal) lewru bee walla lebbi ɗiɗi bee-no feere mun heɓori woo- men waɗa hen piiji ndan: Diina, pinal, renndo, taariika, fillayee, ballafuyee, kumpite, jalniika, taali e tinndi, jiɓi-liɓi, gannde kese, lesɗe e ca’e fulɓe, kawre (rencontres), e ko nanndi.
Hara ngal sennditete e leydi kala ka jangoowo hittinɗo fii pulaar/fulfulde woniri e windere nden.

5. Misiide Rajoo:
Si Alla salaaki, misiide nden sincay rajoo mawnuɗo tawa ko pulaar tan yewtetee ton, hara kadi ka haali-pulaar jo wontirii woo, o henndoto kañum rajoo on, o heɗitoo.

Noddaandu
Musiɓɓe tedduɓe,
Kala annduɗo hino gayna gootel e ɗee eɓɓooje Misiide nden, haray himo toraa wallitorgol yeru makko on, sabu golle ɗen ko kafu-ɗen, fii ɓamtal pulaagu ko ko himmir-ɗen en fow. Tippude e ɗum, miɗen noddita kala faalaaɗo tawtude men e golle ɗen, haray ko saɗi ko toolii.

Jokkorɗe amen
Ngam humpondiral ngal newoo hakkundeeji men, misiide nden hino sinci konte (comptes) ɗuuɗuɗe gasayɗe newinnde jokkondiral e Musiide Ɓamtaare, ko kanje woni ɗee ɗoo:
– Imeel amen on ko: misiidemedia@gmail.com
– facebook on ko: www.facebook.com/Misiide
– Ka twitter ko: @misiide
– Ka Youtube ko: www.youtube.com/Misiide
– Tonngoode nden ko: +212 6 74 38 41 11

Timmoode
Fewdo ɗoo, ko ɗee dunce ɗoo woni ko Misiide Ɓamtaare eɓɓi, e hoore non feere yaajunde heɓaaki taho daranagol ko ɓuri kon e ɗee eɓɓooje! E kadi, ko no lowe men ɗen ɗiɗi (www.misiide.com) (www.misiide.com/ar) ñiiɓira men ɓuri dolnorde oo saa’I ɗoo, wondude e yowugol winndannɗe kese, e kala golle yowondirɗe e kañum lowe ɗen ɗiɗi.
Kala marɗo feere no nde wa’I woo (ngalu, doole, pehe, ekn), haray Misiide nden hino hatonjiniri muraadu moƴƴuru. Sabu eɓɓooje ɗen hino ɓuri feere nden, ko annuyee on tun woodaa taho.
Ko wano non kadi kala jogiiɗo miijo no eɓɓooje ɗen eltiree (corriger) ɓamtiree fii mun e noone goo, haray ko toolii dambugal ngal hino udiitii fii sugu ɗin miijooji ɗon ko aldaa e gacce.

Awa en torondirii immagol jonnindira juuɗe, ɓamten pine men e naamuuji men, sabu “ko ɗemngal woni wonkii leñol”, alaa ko ɓuri hoyude haa hewta jangude ɗemngal mun. Daranagol ɗemngal mun ko ɓural, ko fii non “ɗemngal ko dokkal”. Awa weltoren ɓamten fii ngal dokkal ngal Alla yeɗi-ɗen. Pulaar kay ko ɗemngal.
Wassalaam.

Immorde e yiiloowo Misiide Ɓamtaare on
Muhammad Tafsir SALAMBANDE
www.misiide.com
www.misiide.com/ar

Maanditee!

Geɓal Misiide Arab ngal fuɗɗaaki gollude taho, golle hino jokkaa fii mun.

Rokku miijo (coment)

%d blogueurs aiment cette page :