Nafitorgol karallaaji kesi fii jannugol Fulfulde

 Gila internet layi, humindiri jamaaji ɗin, wontuno laawol lumbinirngol miijooji e eɓɓooje, maandinirngol jannde e gannde. Ko e ngol laawol kadi yimɓe ɓen waɗti daɗndirde ngaddamaakuuji maɓɓe e finaa-tawaaji maɓɓe, seɓitoriiɗi mulugol. Jokkito »

Miijo: Yahugol njananiri fii ɗaɓɓere e nguu jamaanu hannde!

Fulɓe wi’i: « Mo haylaaki o haylay hoore ». Ndee tiitoonde yahugol njananiri fii ɗaɓɓere e nguu jamaanu hannde no hitti fota fota, teeŋtinii wonande sukaaɓe wontirɓe hiirnaange Afrika (west Africa), sabu yaltugol fii Jokkito »

Fulɓe e Luumol nder Najeeriya

Joomirawo waddii jamanu ko halli to Fulɓe Najeeriya: Na’i amen keeñi. Iyaalu ɗuuɗi. Ko ɗuuɗi nder sukaaɓe amen accii durngol ngam na’i keppaama – ɓe ngalaa ilmu, ɓe ngalaa sanaa’a, faa woɓɓe Jokkito »

Tawtee e foolotiro tafugol « Meme » ngol ka Ɗemɗe Neeniije

Musiɗɓe tedduɓe, juurotooɓe Misiide, Men hewtidii hannde kadi e kumpital mawngal, kumpital ɓamtaare Fulfulde, e jurol gannde kese. Wano woowiri non, tuma kala, men humpitay on ka ɗemngal men ngal naatiri e Jokkito »

UNESCO humpitii tiitoonde ñalaande winndere ɗemɗe neeniije ɗen 21 Fabraa’iru 2017!

Fii mawningol ñalaande Hakkunde-leyɗeere wonande Ɗemɗe Muynaaɗe Ɗen ñalnde 21 Fabraa’iru 2017, UNESCO, fedde kippunde nden fii ɗuuɗal pine e ɗemɗe.. ka aduna, okkuɓe kadi ñalaande 21 Fabraa’iru nden e hitaande kala, Jokkito »

 

Pinal: Dewle ɗen ka men e sabbordu suumayee

Musiɓɓe tedduɓe,
Miɗo anndita ɗoo nduu lewru mawndu, hittundu fuuta. Lewru hittundu e jamaa on fow ka men, teŋtinii non jiwɓe ɓen, sabu ko e mayru woni ko ɗuuɗuɓe e maɓɓe resetee, jombee ɗowtitee…

Si mawɓe ɓen innitinriino nduu lewru “Sabbordu suumayee”, sukaaɓe hannde ɓen ko “Sabbordu sonna” jammi ndu! Mo bee e faandaare mun; mawɓe ɓen faandorii e cuɓal maɓɓe ngal, tawde ko ndun lewru ɗon fadortee (sabboree) suumayee on. Sukaaɓe ɓen kan faandori jammoore mun nden tereeti sonna on, sabu ko e nduu lewru woni ko dewle ɗen sukkata ka men fuuta…Sabbordu suumayee, e sabbordu sonna, ko innɗe ɗen serti, kono lewru ndun kan ko woorturu, haajuuji ɗin ko woowaaɗi…

Mi lamndoo! Hol ko nduu lewru lolliri ka men? Immorde e finaa-tawaaji, ekn?
Ka banngal diina, nduu lewru ko hebilordu fii korka kan, hebilordu suumayee on, hebilordu daranaade dewe ɗen ka suumayee…
“Yumma Aa’isha (Yo Alla wele ɓe), no fillii wonde Nulaaɗo Alla on mo jam e kisiyee woni e mun on; ko e nduu lewru ɓuraynoo hoorude si feƴƴii suumayee”. Haa ɓe lamndaa fii ɗum, ɓe jaabii (Yo Alla hisnu ɓe): “Ko e nduu lewru woni ko golleeji ɗin ɓamtetee ka Alla, miɗo yiɗi nde golle am ɗen ɓamtetee ka Alla tawa miɗo hoori”.

Ka bangal finaa-tawaaji non, ko no hollir-ɗen non ka hunorde, ko e nduu lewru dewle ɗen dabbata ka men fuuta, ko kayru woni tereeti sukaaɓe ɓen (worɓe e rewɓe), mo jombaaka e mayru, haray heddike ko arata! Hiɓe jalira ɗum sontuɓe ɓen!

Dewgal woo dewgal, ko maa ngal fuɗɗora toraare, hari ɓaawo ɗoo nun, ko mawɓe suka on torantoo mo sonnaajo makko arano on, foti non ko kanko yi’I mo walla le ko mawɓe ɓen tini mo, goro yaltinee kisan, ko ɗen gorooje wi’etee Hunorɗe laawol, e maanaa “lamndorɗe si jeyɓe jogaaki”…

Adadu ɗen gorooje, ko ɗe sappo (10), woɓɓe waɗa saaku lamɗam, walla kore tew kosam, ekn. Ɗum ɗon fow naɓee ka mawɓe jiwo on fii hunagol laawol, Ko e battane nden hunannde mawɓe suka on anndata si tawii « Jeyɓe jogaaki », ngam ɓe heɓa no ɓe addira gorooje hikkuɗe ɗon ɗen.

Laawol ɗimmol ngol; Ko Goro toraare yaltinntee, ko e ngol laawol ɗon woni ko mawɓe suka on torantoo sagataa maɓɓe on jiwo ɓeya on, si ɓe okkii, haray gila nden ñannde, haa woni tuma dewgal ngal taatike woo, kañum torondirɓe ɓe ɓen (gorun kun e deyun kun), haanaa yiidude, sakko ɓe yewta, maa ɓe waɗa fija-jala! Ɗum ko ko haɗaa! Tuma kala nde jiwo on nani hito suka on; o dogay o suuɗoo, si tawii le ko bee ɓe yiida; haray ko maa si goɗɗo lombi…

Mawɓe jiwo on senndana bolondaa on goroojo ɗen, ɓe waɗana mawɓe ɓen e kawte ɗen feccere, ndeya feccere; ɓe sennditana ɓeenguure nden e hedditiiɓe ɓen.

Si ɗum fow feƴƴii, ñalaande desal ngal taƴee (happee), jamaa on hollitee, mokobaaɓe ɓen teddiniree, imaamuuɓe ɓen humpitee, kabaaru on saakitee…Suka on waɗa dolokke baaba, e hudere yumma, o holtina jommba jiwo, e banndiraaɓe mun, ekn

Nden ñannde, maaro defee, lacciree surtinee, njaram hebilee, teewu defee… Haaju on waɗa, pinka fettinee, ñi’e sennditee, hoɓɓe wernee, jommba ɗowtitee, seleli yimee, hoɗo ngon nanntondira welo-welo…

Jommba bammbee ɗowtitee ka moodi mun, ɓe fuɗɗoo ngurndam kesan, ko ɗum welnii nduu lewru sabbordu suumayee ka men…

 

Si peera mon on hewtii, humpitee « Misiide Services », nde Misiide Ɓamtaare, ngam men sofitinana on nden ñalaande, wondude e welo welo finaa-tawaaji men.

Men waynike, hiɗen ka peera si ko ɗum muuyaa.

Kuɗol: Muhammad Tafsir SALAMBANDE
Mo Misiide Ɓamtaare,
fii diina, pinal e ɓamtaare
Wassalaam
www.misiide.com

One Response to Pinal: Dewle ɗen ka men e sabbordu suumayee

Rokku miijo (coment)

%d blogueurs aiment cette page :