Gonal Fulfulde ndeer gannde kese

Fulfulde e gannde kese, ko tiitoonde winndannde nde wiɗtooɓe ɗiɗo (2) misranaaɓe hawtiti winndi, ɓen ngoni : Dr. Aadel Usmaan Imam Ayat, jannginoowo ɗemɗe afrik, to Duɗal Ɗemɗe e Eggo (faculté de Jokkito »

Ciimtol FPU & FPUNA nder Washington: 7, 8 & 9 lewru Morso (July), 2017

Taariika Fulɓe Progressive Union (FPU) ko mojobere daraniinde fiyaakuuji renndo e pinal. Ko e hitaande 1966 nde sincaa e nder Sarlon. Innde mayre aranere nden fewndo nde sincaa ko Fullah Youth Organization Jokkito »

Nafitorgol karallaaji kesi fii jannugol Fulfulde

 Gila internet layi, humindiri jamaaji ɗin, wontuno laawol lumbinirngol miijooji e eɓɓooje, maandinirngol jannde e gannde. Ko e ngol laawol kadi yimɓe ɓen waɗti daɗndirde ngaddamaakuuji maɓɓe e finaa-tawaaji maɓɓe, seɓitoriiɗi mulugol. Jokkito »

Miijo: Yahugol njananiri fii ɗaɓɓere e nguu jamaanu hannde!

Fulɓe wi’i: « Mo haylaaki o haylay hoore ». Ndee tiitoonde yahugol njananiri fii ɗaɓɓere e nguu jamaanu hannde no hitti fota fota, teeŋtinii wonande sukaaɓe wontirɓe hiirnaange Afrika (west Africa), sabu yaltugol fii Jokkito »

Fulɓe e Luumol nder Najeeriya

Joomirawo waddii jamanu ko halli to Fulɓe Najeeriya: Na’i amen keeñi. Iyaalu ɗuuɗi. Ko ɗuuɗi nder sukaaɓe amen accii durngol ngam na’i keppaama – ɓe ngalaa ilmu, ɓe ngalaa sanaa’a, faa woɓɓe Jokkito »

 

Ciimtol Tabital Pulaagu Leyɗe Arab ko faati e yuɓɓin’de Ñalaande Pinal 1, keer 24/02/2015

Tabital Pulaagu Leyɗe Arab (TP/LA) yuɓɓinii ñalaande kawral pinal les tiitoonde: “Ñalaande Pinal 1: Ɗemngal e Pilal Pulaar/Fulfulde e ɗemɗe Afrik goɗɗe”. Ndee ñalaande yuɓɓinaa ko e ballondiral e Kawtal J.P.F e leyɗe Arab e janngirde wiɗtooji Afrik, Jaaɓi-haaɗtirde Keer (Université du Caire) ñande 24/02/2015. Ɗum wonndoo ko ñallal ngal fof gila 10:00 haa 20:00. yiilirde (TP/LA) na winnda ngol ciimtol (rapport) ngam laɓɓinde no ndee ñalaande pinal waɗiraa. Ciimtol ngol na renndini toɓɓe garooje ɗo:

  • Miijo yuɓɓingol ñalaande nde
  • Heblugol ñalaande nde
  • Siinude ñalaande nde
  • Teskuyaaji e tinndinooje (wasiyaaji = bagginooje)

Gila nde Tabital Pulaagu Leyɗe Arab fuɗɗaa sinceede ɓaawo pellital soseede TP/LA iwngal e mooɓondiral TPI 31/12/ 2011 haa 2/1/2012 to Bamako, Mali. Tawii nelaaɓe iwde Ejipte tawanooma yoga e batuuji TPI, wano mooɓondiral Bamako 2012 nelaaɗo Ejipte Abdou BA tawano ngaal mooɓondiral, e Kawral TPI Kameruun ñande 22/03/2014 nelaaɗo TP/LA Abdourahiim Jeynu Diin tawano nguun batu. Gila ndeen haa jooni miɗen etoo tabitinde TP/LA, e yuɓɓinde batu renndinoowu musidɓe wonɓe e leyɗe arab ngam mahde yiilirde huɓtidinnde e winndude ginol e ɗereeji ndernderi (régalement intérieur).

Ndeer ɗuum, e maayirɗe hitaande 2014 woni ko min puɗɗii miijaade yuɓɓinde ñalaande Pinal, ɗuum waɗi min njokkondiri e banndiraaɓe wonɓe e leyɗe arab ngam diisnondirde e maɓɓe, keewal ngal jaɓi miijo ngo.

Faandaare Ñalaande nde:

Na woodi paandale ɗiɗi mawɗe: 1- Ɓannginde e semmbinde ɗemngal e pinal fulfulde nder leyɗe Arab; 2- Renndinde banndiraaɓe wonɓe e leyɗe Arab haa ɓe mbaawa sosde e yuɓɓinde yiilirde gollirde TP/LA.

Na woodi kadi paandale goɗɗe keeriiɗe muuyanooɗe e ndee ñalaande, ɗeen ngoni : -suusnude yimɓe e woownude ɓe hollirde ko’e maɓɓe no ɓe njiɗiri yi’ireede; -Anndinde janngooɓe e ardiiɓe janngirɗe Fulfulde e leydi Ejipte gonangal e semmbe ɗemngal ngal e pinal maggal, mbela ɓe ɓeydoo cuusal jannginde fulfulde ; -Hollirde ngalu e pinal ɗemngal ngal nder ɗemɗe Afrik goɗɗe ɗe ; -Anndude semmbe e ustaare Fulfulde yeeso ɗemɗe Afrik goɗɗe ɗe.

Teskuye:

Ɗemɗe jeewtiraaɗe e kawral ngal wonndoo ko : Fulfulde e Arab e Faranse, kono ndeer jolle batuuji ɗiɗi keerorɗi wiɗtooji ɗii ko ɗemngal Arab ɓurnoo haaleede, ɗuum ko ngam yottinde miijooji ɗi e paandale ɗe faade e leƴƴi goɗɗi, teeŋti noon ejiptenaaɓe arnooɓe e keewal.

E teskaade won’de musidɗo Abdalla Soh winndunoo wiɗto makko ngo ko e Pulaar/Fulfulde, ɗuum na haani yajjineede ko arata.

 

Caggal /ɓaawo nde miijo yuɓɓinde ñalaand nde tabiti, yiilirde TP/LA noddi yoga e musidɓe ngam waɗde goomu heeriingu yuɓɓinoowu e siinoowu miiji ngo. Tere goomu ngu suɓaa iwde e leyɗe ceertuɗe, goomu ngu lelni njuɓɓudi golle e laawol no jawdi heɓiree, e jokkondirde e banndiraaɓe, nder Ejipte e yaasi mum, ngam newnaneede yuɓɓinde ñalaande nde,  e tawtoreede yimɓe ñallal ngal. Ndeer heblo ngo goomu ngu tawi jawdi ko golliree alaa, ɗuum waɗi goomu ngu eɓɓani keɓal jawdi e laawol no ardata : 1- balle iwde e musidɓe wonɓe nder Ejipte; 2- balle iwde e Kawtal J.P.F ; 3-ballite iwde e TPI; 4- balle iwde e pelle e musidɓe wonɓe yaasi.

Goomu yuɓɓinoowo (comité d’organisation):

Innde Leydi to jeyaa
Abdu Bah Senegaal
Ablaay Soh Muritani
Gamo (Saydu) Jallo Senegaal
Muhammed Aliw Jallo Gine
Yuusuf Bari Gine
Abdurahim Jeynu Diin Kameruun
Ceerno BAH Gine
Ibrahiima Bari Gine
Muktaar Jallo Gine
Hasan Bello Kameruun
Abdallaa MAhmuud Santar Afrik
Muktaar Beelel Kameruun
Waliid Daabo BAH Kameruun
Jibriil Balnde Senegaal

1) Balle keɓaaɗe

Ɓaawo nde goomu ngu winndi ɓatakeeji faade e wallidiiɓe nder e yaasi Ejipte, heewɓe nootii nduu noddaandu, ɓe mbaɗi balle jawdi, ɓeen waɗɓe balle maɓɓe ngoni.

Balle iwde e musidɓe nder Ejipte

Balle keɓaaɗe iwde e mawɓe e sakiraaɓe :

Ambassadeur Senegaal Mammadu SAL; Mawɗo Ibrahiim Jallo to Dental Afik; Mawɗo Abdou Bello to Ambassade Kamerun; Mawɗo Aamadu Iisaa to Ambassade Santar Afrik; Mawɗo Abdul Kariim Dukure to Ambassade Burkina Faso; e Dr. Aadel Usmaan, e Hiba Khaliifa, e yoga e musidɓe janngooɓe.

Balle iwde yaasi Ejipte

Ballirɗo Teskuye
Fedde Isra’il Kamɓe ɓuri wallitde, ko ɓe teral TP/LA
Fedde Fuuta Jalon to Anngola Ko wallidiiɓe tiiɗniiɓe sanne
Fedde Kuwet (TP/Kuwet) Eɓe aadori wallitde, ko ɓe teral TP/LA
Yoga e musidɓe to Amerik Mujtaba Bah e Kaba Bah e ….
Muhammed Seen (Sa’udiya) Tiiɗnaniiɗo ɗemngal ngal

 

2) Jokkondiral

Goomu yuɓɓinoowo waɗii jokkondire nder e yaasi Ejipte ngam anndinde yimɓe ɓe tabitgol miijo ngo e ɗaɓɓude e maɓɓe tawtoreede kawral ngal e balle jawdi, teeŋti noon wonɓe e leyɗe Arab e mawɓe TPI. Goomu ngu neldi ɓatakeeji ɗereeji e E-mailji faade e denndaangal musidɓe nder e boowal Ejipte, waɗi kadi noddaali Telefonji. Tawii kadi goomu ngu jokkondiriino e janngirɗe e kawte noddaaɗe ngam newnaneede yuɓɓinde kawral ngal to jaaɓi-haaɗtirde (iniwersite) Keer.

Ɓaawo ɗee jokkondire goomu ngu heɓi ko arata ɗo :

  • Jaɓaneede e newnaneede yuɓɓingol ñalaande 1 : ɗemngal e pinal Pulaar e ɗmɗe Afrik goɗɗe, to J-H Keer : 24/2/2015
  • Humpitiiɓe fii ɗemngal e Pinal Pulaar jaɓii ɗaɓɓal TP/Leyɗe Arab ngam heblude wiɗtooji e yeewtude e ñalaande Pinal nde.
  • Tawtoreede yoga e mawɓe noddanooɓe foti ko hooloraaɓe (Ambassadeurs) yoga e leyɗe Afrik, maa ardiiɓe janngirɗe e kawte goɗɗe.
  • Goomu ngu waɗi feere haa musidɗo Mammadu Tafsiiru Balnde (Marok) waawi arde tawtoreede ñalaande nde.
  • Heɓde balle jawdi ngam siinude kawral ngal e mbaadi ɓurndi moƴƴude.
  • Renndinde defte e kuutorɗe (gollirɗe : keyeeji) ngam waɗde hollito pinal (exposition Culturelle)
  • Heblude alluuje nate (panners) kollitooje yoga e mawɓe Fulɓe to baŋŋe diine e dawrgol e winndooɓe, e pinal pulaaku.

Ñalaande Pinal 1 waɗaa ko ñande 24/02/2015 to Jaaɓi-Haaɗtirde Keer, Ejipte, nde waɗiraa no eɓɓiranoo e jam, gila njamndi 11 :00 haa njamnd 19 :00.

Toɓɓe jeewtaaɗe:

Goomu ngu dottuno toɓɓe potɗe yeewteede, tawa eɗe ngona e calɗi tati : 1- Daartol Pulaar e Fulɓe ; 2- Ɗemngal e Coñce Fulfulde/Pulaar ; 3-Pinal. Limoore yeewtuɓe tawtoraaɓe ñalaande nde ko sappo e go’o (11), yoga e wiɗtooɓe njeewti ko fii ɗemɗe Afrik goɗɗe (Suwahil e Hawsa e Amharik) ko Fulfulde wonndoo ko huufi ɗeen ɗemɗe nder ngal kawral. Ñalaande nde wonirnoo ko e jolle (batuuji) tati, no ardata ɗo :

1-Jonnde udditirde

Nde fotnoo fuɗɗaade ko e njamndi 11 :00 kono nde leei fuɗɗaade saba leelde arde musidɓe noddaaɓe ɓe, kono nde njamndi 11 fotata tawii mawɓe noddaaɓe ɓee ngarii, ɓeen ngoni Ambassadeur Kameruun Mawɗo Muhammad Labaran ; e Amassadeur Senegaal Mawɗo Mammadu SAL, e Mawɗo Ibrahiim Jallo to dental Afrik ;  e Ambassadeur Gine Mawɗo Soriba Kamara ; nulaaɗo Ambassade Burkina Faso Mawɗo Abdukariim Dukure ; e Mawɗo gardiiɗo janngirde wiɗtooji Afrik Dr. Hasan Subhii ; e Mawɓe ardiiɓe baŋŋe ɗemɗe Afrik to J-H (UV) Keer e Ajhar : Dr. Muhammad Nowfal e Dr. Abdul Hayyi Saalim; e mawɓe woɓɓe.

E ndee jonnde udditirde mawɓe ɓe fof kaalii ko heewi ko moƴƴani Ɗemngal Fulfulde/Pulaar e pinal mum. E teskaade, heen mawɓe  na kaala Fulfulde, ɓeen ngoni Mawɗo Ibrahiim jallo (Gine) Ambassadeur Mammadu Sal (Senegaal) Ambassadeur Muhammad Labarang (Kameruun) Mawɗo Abdul Kariim Dukure (Burkina).

Toɓɓe ɗe ɓe ɓuri haalde woni : 1) teeŋtinde himmugol ɗmngal Pulaar/Fulfulde nder Afrik ; 2) no yimɓe poti daroraade ngam ɓamtude Fulfulde e ɗemɗe Afrik e pine majje ; 3) caɗeel e kaɗooje gonɗe yeeso ɓamtaare ɗemɗe men, wano sukaaɓe hannde kimmiraani fii ɗemngal ngal e pine maggal, woodi heen wiiɓe wonde yoga e ɓesnguuji sukaaɓe ɓee mbaawaa haalde Fulfulde, ɗuum noon ko bone kulɓiniiɗo ; 4) weltoraade ngal kawral ngam ɗemngal e pinal Fulfulde.

E gasirɗe ndee jonnde TP/Leyɗe Arab okki mawɓe ɓee bahaaɗe (alluwon binndakon fulfulde) wondude e Jaaynde PEERAL hesere, ɗuum ko ngam teddinde ɓe e weltanaade ɓe.

Teskuye : e ndee jonnde haalooɓe ɓee kaalii ɗemɗe ceertuɗe : Arab e Fulfulde e Faranseere. Ko e ndee jonnde kadi yoga e mawɓe okkaa bahaaɗe (alluwon binndakon fulfulde) ngam teddinde ɓe e weltanaade ɓe e darnde maɓɓe.

-Fooftere njaram:

Caggal ndee jonnde TP/LA waɗani tawtoraaɓe ɓee njaram Attaaya (Saay : Kafe) e ñaamdu hoyndu, ɓaawo ɗuum mawɓe ɓee mbaynii ngam jokkude ɓe golle goɗɗe.

2- Jonnde ɗiɗaɓere

Ndeen woni jonnde jeewte adiinde, nde fuɗɗii gila njamndi 13 :00 haa njamndi 15 :10. E ndee jonnde yeewtooɓe njeeg’o (6) kolliti wiɗtooji ɗi ɓe mbaɗi e ɗemngal Pulaar e coñce mum, e yoga e ɗemɗe Afrik goɗɗe. e ndee jonnde Dr. Aadel Usmaan gadiiɗo janngude fulfulde e tolno PHD yeewtuno ko faati e daarol Sammba Gelaajo Jeegi, o seɗi ngol o wesi, ko noon kadi musidɗo Tafsiir Balnde (iwde leydi Marok) yeewtiri gonal Ɗemngal fulfulde nder Teknoloji keso o, ko yeewtere teskaande wonndo, sabu wano mayre heewaani yeewteede e ɗee kawre.

– Fooftere Bottari / soƴƴaari:

Nde jonnde ɗiɗaɓere ndee gasi TP/LA waɗi bottaari wonande kala arɓe tawtoreede kawral ngal, Alla waɗi kala arnooɓe, mawɓe e sukaaɓe rewɓe e worɓe, keɓiino geɗal maɓɓe, ɗum waɗi e keewal e peewal.

3- Jonnde tataɓere:

Ndee woni jonnde jeewte ɗiɗaɓere, caggal bottaari, e njamndi 17 :00 jonnde nde fuɗɗii jokki haa njamndi 19 :00, ndeer heen yeewtooɓe njowo (5) kaali fii Pulaaku e ɗemngal Fulfulde e coñce maggal) e batte ɗemngal Arab nder Fulfulde, e mago (théâtre) keerol gootol e ɗemngal Suwahil. Wiɗtooji ɗii memii toɓɓe kimmuɗe keewɗe, ɗuum waɗi TP/LA na enniyii yaltinde ɗiin wiɗtooji haa nafoore majji waawa yaajde.

 

1-Alluuje binndaaɗe (paners):

E ndee ñalaande Pinal 1, TP/LA hebluno alluuje (paners) ɗiɗi : 1) Allauwal go’aɓal ngal woni heen ko anndinde Kawtal J.P.F e leyɗe Arab e Tabital Pulaagu Leyɗe Arab, engal renndini binndi e nate (photots) 2)Alluwal ɗiɗaɓal ngal woniri ko e pecce nayi : -a) heen senngo oni heen ko nate yoga mawɓe diine e dawrugol e winndiyaŋkooɓe ; -b) senngo Nagge e kosam ; -ɓ) senngo Pinal e karallaagal (culture et arts). Ɗuum ko ngam ɓannginde yoga e mawɓe fulɓe e pine maɓɓe.

2-Seedeeji (certificats) faade e rennduɓe e ñalaand nde:

E ndee ñalaande TP/LA, e wallondirde e janngirde wiɗtooji Afrik to Jaaɓi-Haaɗtirde Kee, waɗi seedeeji teddungal wonande rennduɓe e ndee ñalaande Pinal, ɗiin seedeeji woniri ko e mbaadiiji ɗiɗi : 1-Seedeeji ɗi TP/LA renndi waɗani tawtoraaɓe e jeewte ɗee, ɗi mbinndaa ko e Arab, eɗi laɓɓina wonde ɓe mbinndii wiɗtooji ; 2-Seedeeji ɗi TP/LA renndi e Kawtal J.P.F waɗani ɗi Yeewtuɓe ko faati e Fulfulde/Pulaar, ɗi mbinndaa ko e fulfulde.

 

 

1) Teskuyaaji:

Na jeyaa ko maanditaa e ngal kawral Pinal:

a- Tiiɗnaare mawnde waɗaama ngam yuɓɓinde ndee « Ñalaande Pinal 1: Ɗemngal e Pilal Pulaar e ɗemɗe Afrik goɗɗe » goomu yuɓɓinoowo ngu waɗii golle lobbe e tiiɗnaare mawnde haa ñalaande ndee waawi laataade e mbaadi ŋarɗundi (labaandi) nder ngonka leydi Ejipte jooni, sabu na anndaa  wonde oo yonta jooni leydi ndii na woodi dille, hoolaare nde na saɗtinaa, kono ɗuum haɗaani nguumu ngu waɗi jokkondire e newaare haa ardiiɓe janngirɗe e hoolaare leydi ndi njaɓani en yuɓiinde ndee ñalaande Pinal.

b-Ballital heɓaama iwde e musidɓe e pelle nder e yaasi fuu, woodi musidɓe mballirii jawdi e suusnude, woɗɓe ballirii miijooji, ɗuum waɗi haa ñalaande nde waawi laataade.

ɓ-Tabital Pulaaku International (TPI) waawaani renndude e kawral ngal, ɓaawo goomu ngu neldii ɓatakeeji (E-mails) faade e hooreejo e koolaaɗo kuuɓal TPI ngam tinnude ɓe kawral ngal, e ɗaɓɓude e maɓɓe ballal, kono ngoomu ngu heɓaani hay jaabawol iwde e maɓɓe, tawii kadi jokkondiral e mawɓe TPI sakket oo wonaa ko newii no feewi. E anndude wonde TP/LA na nelda ciimtol (raport) kala hitaande, kono meeɗaa heɓde jaabawol maa tintinde iwde e TPI. Kadi gila (ila) nde mawɗo Buubakar Balnde natti TPI neldataa min pellite (décisions) e eɓɓaaɗe (plans) maa tinndinooje maa bagginooje (recommandations) maɓɓe, ɗuum waɗi min nganndaa ko waɗaa e ko eɓɓaa.

c-Musidɓe renndidaaɓe e TP/LA mbaawaani tawtoreede no eɓɓiranoo, tawtoraa heen tan, e ballal TP/LA, ko musdiɗo Muhammad Tafsiiru Balnde to laamaandi Marok, ɗuum na jeyaa e ŋakkere (ustaare) nde goomu ngu sunori.

d-Kawral ngal waawii ɓeydude ɓanngin’gol Ɗemngal Fulfulde e Pinal maggal nder leydi Ejipte.

ɗ-Yoga e musidɓe wallirii saaktude noddaandu faade e yimɓe fof ngam tawtoreede ñalaande nde, wano musidɓe : Saajo BAH to peeral.com (Beljik) e Muhammad Tafsiiru BALNDE to misiide.net (Marok) ɓe yaltini noddaandu ndu e lowe (sites) maɓɓe.

e-Goomu ngu waawii daraade waɗi ballal haa musidɓe men wonɓe saare Alekse (nder Ejipte) ari tawtoreede ñalaande nde.

2) Tinndinooje (bagginooje):

Tabital Pulaagu Leyɗe Arab, ɓaawo yuɓɓingol ndee ñalaande Pinal, na nodda e tinndinooje garooje ɗe :

  • Tabital Pulaagu Leyɗe Arab na yuɓɓina « ñalaande Pinal » kala duuɓi ɗiɗi, ɓeyda coftale ñalaande nde, kadi yajjina tawtorteeɓe iwde e pelle goɗɗe.
  • Yo TPI ɓeydu ballondiral e cate (branches) maggal, tawa engal anndina cate ɗee fof kala ko waɗaa e kala ko eɓɓaa. TPI na haani wallude TP/LA haa daroo, sabu TP/LA na jogii caɗeele jawdi e yuɓɓino.
  • Musidɓe renndidaaɓe TP/LA na haani ɓeydude renndugol maɓɓe e miijooji e cofte men, sabu TP/LA wonani ko kala wonɓe e leyɗe Arab fow. E teskaade haa jooni yiilirde (bureau) TP/LA ko yiilirde fuɗɗorde, wonaa yiilirde suɓaande gasirde. Miɗen nodda ndenndaangal renndidiiɓe e leyɗe Arab yo en ɓeydu jokkondiral haa mbaawen winndude ɗereeji nder-nderi e lelnude njuɓɓudi golle, e suɓaade yiilirde
  • Waɗde jokkorɗe jaayle (rajo , Telewisiyon, jaayndeeji) ngam yaltinde ganndaaɗi (informations) men e hollirde ko’e men no haaniri yeeso aduna o fof, wonaa eɗen njeloo (toroo) maa eɗen ɗaɓɓa heƴñoreede e teleeji yimɓe woɗɓe.
  • Renninde defte binndaaɗe e Pulaar/Fululde tonnga ɗe e doggol (liste), teeŋti noon defte coñce (littérature) e caggitorɗe e dosɗe (grammaires).
  • Winndude daartol (histior) fulɓe e golle maɓɓe nder Afrik, sabu na woodi ko haani feewniteede, kadi na woodi ko haaletee jooni moƴƴanaani daartol men.
  • Eggude wiɗtooji (majister e doktora ….), baɗaaɗi e Fulfulde nder jaggirɗe Ejipte, faade e Fulfulde, ɗuum maa ɓeydu yajjinde nafa majje. E teskaade na woodi doktoraaji tati baɗaaɗi to Jaaɓi-Haaɗtirde Ajhar eɓɓindiraaɗi hakkunde fulfulde e Suwahili, e majisteerji ɗiɗi e fulfulde tan to Jaaɓi-haaɗtirde Keer, wiɗtooji ɗi na jokki.
  • Woottinde binndol Fulfulde, gila e alkule ɗe (caractères) haa e njuɓɓudi binndol ngol (orthographes). Sabu ɗemngal gootal haanaa winndireede alkule ceertuɗe. TP/LA yahri ko winndirde alkule ɗe asli Late ɗen.

Kuɗol: Dr. Abdu BAH

Keer 25/03/2015

 

Rokku miijo (coment)

%d blogueurs aiment cette page :