Nafitorgol karallaaji kesi fii jannugol Fulfulde

 Gila internet layi, humindiri jamaaji ɗin, wontuno laawol lumbinirngol miijooji e eɓɓooje, maandinirngol jannde e gannde. Ko e ngol laawol kadi yimɓe ɓen waɗti daɗndirde ngaddamaakuuji maɓɓe e finaa-tawaaji maɓɓe, seɓitoriiɗi mulugol. Jokkito »

Miijo: Yahugol njananiri fii ɗaɓɓere e nguu jamaanu hannde!

Fulɓe wi’i: « Mo haylaaki o haylay hoore ». Ndee tiitoonde yahugol njananiri fii ɗaɓɓere e nguu jamaanu hannde no hitti fota fota, teeŋtinii wonande sukaaɓe wontirɓe hiirnaange Afrika (west Africa), sabu yaltugol fii Jokkito »

Fulɓe e Luumol nder Najeeriya

Joomirawo waddii jamanu ko halli to Fulɓe Najeeriya: Na’i amen keeñi. Iyaalu ɗuuɗi. Ko ɗuuɗi nder sukaaɓe amen accii durngol ngam na’i keppaama – ɓe ngalaa ilmu, ɓe ngalaa sanaa’a, faa woɓɓe Jokkito »

Tawtee e foolotiro tafugol « Meme » ngol ka Ɗemɗe Neeniije

Musiɗɓe tedduɓe, juurotooɓe Misiide, Men hewtidii hannde kadi e kumpital mawngal, kumpital ɓamtaare Fulfulde, e jurol gannde kese. Wano woowiri non, tuma kala, men humpitay on ka ɗemngal men ngal naatiri e Jokkito »

UNESCO humpitii tiitoonde ñalaande winndere ɗemɗe neeniije ɗen 21 Fabraa’iru 2017!

Fii mawningol ñalaande Hakkunde-leyɗeere wonande Ɗemɗe Muynaaɗe Ɗen ñalnde 21 Fabraa’iru 2017, UNESCO, fedde kippunde nden fii ɗuuɗal pine e ɗemɗe.. ka aduna, okkuɓe kadi ñalaande 21 Fabraa’iru nden e hitaande kala, Jokkito »

 

Ceerno Siraajo BAH, hoodere Pulaaku nden

Janngooɓe Misiide tedduɓe,
Hannde kadi men addanii on kabaaru welɗu fii gooto e koode men daraniiɓe pine men. On tinii ɓaawo ɗoo num, hari ko winnda mara mawɓe ɓen liggoraynoo fii diina e pulaaku. Kono fewndo hannde, ko maa ɗum jillida e gannde kese ɗen: Yalta ɗaɓɓita, winnda wenga, humpita humpaaɓe. Wano Seeleŋke JALLOH holliri non ka gimɗol maɓɓe tiitoraangol “Ko an mi winndani”:

“Ko an mi winndani
An! Fii yaa janngu yeddaa
Fii yaa winndu ɓurnaa
An! Fii yaa finu dillaa
Fii yaa dillu murtaa”
 

Ko wano Moodi seeleŋke JALLOH faaliraa non tigiri ka gimɗol dow ɗoo woni Ko ngendiyaŋkeejo men on Ceerno Siraajo BAH sifitori.
 

Ko ɓe ngaari, lekki annde e monee, lekki majjere e janfeede. Marga Pulaar e Pulaaku, ruttorɗo fii gannde Afriknaaje e ko nanndi.
 

Ceerno on ko jibinannde Fuuta Jaloo, geɗal ka Ceerno Sa’iidu Kompaña Bah (1896-1968) bit.ly/1daB1PM, e Hajja Kadiijatu Manda Bah bit.ly/198Ug8g (1917-1995). Ko kamɓe woni geɗaljo jeenayaɓo on e geɗalɓe ɓen sappo e njeego’o ka ɓeynguure maɓɓe.
 

Ko Gine woni ko ɓe adii duɗaade ka jannde diina e lekkol, ɓe fuɗɗii liggaade ton kadi. Gila law Ceerno on hino himmanno fii ɓamtude finaa-tawaaji fulɓe; wano ko ɓe jannaynoo ka Institut Polytechnique, haa ko ɓe gollaynoo ka Akademii Ɗemnɗe Gine, Konakiri…
 

Fewndo hannde, Ceerno on hio ñiiɓi Ameriki, hiɓe wiƴƴitoo ton fii pulaaku e gannde Afrik. E nder hen, ɓe sincii ton ngalu mawngu fii pulaaku ɓe yowi ɗum ka jowlol enternet, ɓe hebbiniri ɗum kala ko humpaaɗo faaletee, immorde e defte, haa e nate, e winndanɗe, e ko nanndi.
 

Ɓe fampii taho Webfuuta; ɓe hebbiniri lowre nden ngaluuji fuuta Jaloo. Refti ɓe fampii Webpulaaku: Ko nden woni baaba aranere nden, ko ɗon fulɓe fow fottata hino paytoo ɗaɓɓita finaa-tawaaji mun… Ɓe fampike kadi WebAfriqa: Nden lowre laatii maama ɗeya, ko ɗon woni ko ɓe mari ngaluuji Afrik: Gannde e defte, marga e ko nanndi. Ɓe maaki fii ɗe’e tati:
 

Nokkuure webFuuta ndee, ko limodal webPulaaku e kawtital webAfriqa nde jeyaa. Mi yeɗii nde mawɓe an Baa Fulɓe: Cerno Sa’iidu Kompanya e Hajja Kadiijatu Manda. Mawɓe diina, giggol, e ɓeynguure. Immorɓe laral e finaa-tawaa Fuuta. Sellimɓe ndimu, gandal, e nunɗal haa ɓe hooti Saare Goonga. Ɓe hollin mi pehe, taaɠa, e haɠɠil ko mi yonnora aduna. Yo Allaahu yarlo ɓe, yaafoo, okka ɓe maleede Nyande Immital.
webFuuta teddinii kadi Fampinooɓe Jihaadi ɓen Njeenayo, soro an ka neene, Cerno Aliyyu Ɓuuɓa Ndiyan, e dendaangal yimɓe leydi tawaaɓe ka taariika Fuuta-Jalon e Afrika”.

Ko ɗe’e woni lowe mawɗe ɗen, e sengo majje, hiɓe since goɗɗe go’o, ko janje woni:

  1. webGuinée www.webguinee.net/
  2. Camp Boiro Memorial www.campboiro.org/
  3. webMande www.webmande.net/
  4. webCôte www.webcote.net/
  5. webForêt www.webforet.net/
  6. AfriXML www.afrixml.net/
  7. BlogGuinée http://cerno.bindol.net/blogguinee/ .Ko nde’e sakkitore woni ka ɓe furñitata ɗon penaale ayɓe, ɓe faljita winndooɓe, ɓe ɓangina jilɓuɗi ; ka Faransiire.

Lowe maɓɓe ɗen ko eɓɓoore moolanaande fii newagol kumpital daartol (taariika) Afrik e gannde mun, e pine mun ; tippude e binɗi selluɗi.
 

E faamu amen, ma ɓe ɓeydu fampaade lowe goo kadi waɗta e ɗe’e janntaaɗe dow, ɓe jillora hen noone e mejaaji (Media) lolluɗi. Ko nii ɓe holliri ka Engeleere : « More sites will be announced, reflecting the growth and expansion of webAFRIQA(tm), which integrates and publishes static and dynamic data types (text, audio, video) on the World Wide Web, on CD-ROM, and other media. webAFRIQA(tm) will gradually evolve into a data warehousing service on Africa and the Diaspora”.
 

Hannde kiikiiɗe, men tinntoduno e maɓɓe ko hawri e innde Misiide, ɓe yewti fii toɓɓe keewuɗe, tawaa e majje: Pulaaku, ɗemngal, finaa-tawaa e ko nanndi.
 

Yewtere nden moftuno fii hakkunde Ceerno Samba Mombeyaa e Alhaaj Umar Taal; fewndo ko ɓe pooɗondirnoo gere wallafagol ngol ka pulaar/fulfulde; ɓawru hari A. O. Taal weltoraa nden eɓɓoore kulol wota ɗemngal Aarabu ngal mulu fuuta. (E ko filletee).

Ceerno Siraajo ɓeyduno men miijo e on fillayee, ɓe maaki hay si ɗum tabitii ko goonga, en ittataa wonde gooto e taalibaaɓe Alajji Umar Taal hino wi’ee “Mammadu Aliw Caam winndii ghasidaare (gimɗol) mun e pulaar o sifii Taariika Alajji Umar fow” e mayre. Ɗum holli “hino woodunoo ka galle makko (A.U.T) winndooɓe e pulaar, woɓɓe hara ko winndooɓe e Aarabu on”. Si ɗum kadi tabitii, haray alaa ko holli wonde Alajji Umar Taal hino añunoo wallifagol ka pulaar haa ka ɓe pooɗondira e Ceerno Samba Mombeyaa! (Ko ko duwaa wiƴƴiteede).
 

Nde men jaarnunoo-ɓe battane golle ɗen, ɓe naɓtuno ɓe jaabii: “Ko kafu men, en fow ko yo en liggor kala ka waawiri ɗon, ko immaniɗen kon; en maayay accen ɗon, ɓayru ko ko welsindanaa ko muutii, ɗii duuɓi cappanɗe jowi e fawɗi yawtuɗi; fus (huunde) geraaka ko kelɗi fii ɓamtugol yimɓe men ɓen”.
 

Ka fiyaake ɗemngal men, men lamndino-ɓe si tawii kulol no woodi e fii mulugol ɗemngal ngal? Ɓa jaabii: “Ngal mulataa”! Sabu “yimɓe men no kelɗi haa, ɓaawooɓe ɓen rewii ko saɗti ɓuri yaasi fewndo hannde on… Mulataa, sabu hiɗen ɗuuɗi haa, yimɓe men ɓen hino firni (softi)”, ko woni tun “jiɓi-liɓi hino ton”.
 

Ammaa ka golle maɓɓe ɓamtugol pulaaku, ɓe holluno fayda ko kamɓe tun kippi, ko woni tun hiɓe mari sabuuji fii mun; gila e newagol fii defte ɗen leydi Amerik ka ɓe ñiiɓi ɗon. Ko ɗum waɗi si ɓe hebbiniri lowe maɓɓe ɗen defte saɗta cogguuje, mettuɗe heɓirde ka men.
 

Ka timmoode, ɓe ñaagino men huunde wootere, himmunde jaŋteede ɗoo, ɗum hino fewti kippuɓe fii pulaaku ɓen e baŋge ɗen fow, ɓe holli: Kala ko mooɓaa kon e wiƴƴitooji ɗin, ko etagol no hewtira ko enternet! Sabu “si tawii no moƴƴinii moƴƴa, mo Zapon on nafitoray, mo « Pôle Nord »on kadi nafitoray, saakoto e aduna Alla on fow hara golle ontigi ɗen fuuyaali hay e seeɗa”.
 

Ko e nguu waaju maɓɓe sakkitoru ɗoo woni ko mi haaɗata e ndee winndannde, haa dañen ko yaaji ɓuri nii fii oo gorko mawɗo; hoodere pulaaku.
 

Hiɗen haa saa’i si no muuyaa.
 

Kuɗol: Muhammad Tafsiir SALAMBANDE
Mo Misiide Ɓamtaare
www.misiide.net

 

One Response to Ceerno Siraajo BAH, hoodere Pulaaku nden

  1. abdurahmane dit :

    Moodi on jarnaama fota

Rokku miijo (coment)

%d blogueurs aiment cette page :